Ancelotti aia Guardiola dah sangtu Alonso

Bayern Munich midfielder Xabi Alonso chuan season tharah Carlo Ancelotti enkawlna hnuaia khelh thuai thuai a chak tawh thu a sawi rualin an manager Pep Guardiola chhuak tur chu pawi a tih thu a sawi.

Guardiola hian season tawp thleng Allianz Arena lama contract a neih chu pawtsei duh loin season tawp rualin German club hi a chhuahsan dawn a, a aiawh turin Italian manager ropui Ancelotti ruat a ni.

Alonso hian season hnih liamtaah khan Ancelotti enkawlna hnuaiah Real Madrid tan a lo khel tawh a, Champions League nomawi an chawi nghe nghe.

Liverpool midfielder hlui Alonso chuan, "Ka ṭhiante hnenah pawh Ancelotti hi coach ṭha tak a nih thu ka lo sawi tawh. Coach ropui tak AC Milan leh Real Madrid-a hlawhtlinna ropui tak lo nei tawh a ni. Mahse, dik taka sawi chuan Guardiola hi kan hnenah la cham se kan ti vek a, coach ka thawhpui tawh zawng zawnga coach ṭha ber a ni, " tiin Jose Mourinho, Rafael Benitez leh Carlo Ancelotti-te ai pawha ṭha zawkah Guardiola chu a ngai.