Dortmund squad-ah Sancho a tel
Borussia Dortmund-in Switzerland-ah season thar atana training an nei dawn a, Manchester United nena sawi zawm Jadon Sancho a tel avangin English club nen inremna an nei hnai lo tih a hriat theih. Dotmund squad-ah hian Old Trafford pan aia German club thlangtu Jude Bellingham a tel bawk.
Season thar atana inpuahchahna ṭha an duh avangin Dortmund hian Manchester United tan hun tiam siamsak a, nimin August 10 kha an hun tiam tawp hun a ni. Amaherawhchu United-in German club sum beisei zat pound maktaduai 100 bawr vel an ngam tak loh avangin inremna a awm thei ta rih lo.
German club-in hun tiam an siam chhan hi season thar atana an inpuahchahnaah rilru kamtu a awm loh nan a ni a, amaherawhchu October 5 thleng transfer hun a inhawn dawn avangin khawtlang media ten Sancho chanchin an ngaihven zui ang.
Sancho hian Manchester City aṭangin kum 2017 khan pound maktaduai 10-in Borussia Dortmund hi a zawm a, kum 2022 thleng contract a ziak. German club hian English winger manah hian pound maktaduai 100 an chhiar bakah sum tak zawk pek tlak nghal an beisei.
Manchester United lamin Covid-19 vangin Dortmund sum phut zat hi a tam hretah an ngai a, German club rilru tih nem nan hian player dang an melh. Tun thleng chuan Dortmund hian an sum phut zat hi tih hniam an tum lo a, Sancho hi contract thar zawrh an rilruk tih thawm a awm bawk.
English club hian out and out winger an neih loh avangin Sancho hi nipui transfer-a an lakluh duh ber a ni a, chutihrualin beiseina sang tak nena an lakluh Alexis Sanchez a fuh tak loh avangin inzir nan an hmang a, uchuak taka sum hman an tum lo.
Dortmund hian kar khat chhung training an nei dawn a, Nilaini hian Austrian club SCR Altach an hmachhawn ang a, Pathianniah Austria Vienna an hmachhawn leh ang. German club hian captain Marco Reus chu inhliam vangin an hruai tel lo a, Bellingham bakah rawlthar duhawm tak tak an hruai tel thung.
Kum 17 mi Jude Bellingham hian Birmingham City aṭangin Dortmund hi pound maktaduai 30 velin a zawm a, English club hian a jersey hak ṭhin number 22 chu an dah ṭha hial. Bellingham hi Championship khelh zawh takah match 41 hial a inlan thei a, goal li chauh khung mah se khelmual chhunga a hmuhnawm avangin a chanchin hian ngaihven a hlawh hle.
Dortmund forward Youssoufa Moukoko hi chhinchhiah a sual lo ang. Kum 15 mi Moukoko hi Cameroon-ah piang mah se Germany Under 16 tan a inlan tawh a, a goal khung theih avangin hriat a hlawh hle.
Borussia Dortmund Squad
GOALKEEPERS
1 Roman Bürki
2 Marwin Hitz
3 Luca Unbehaun
4 Stefan Drljaca
DEFENDERS
5 Manuel Akanji
6 Raphaël Guerreiro
7 Mats Hummels
8 Thomas Meunier
9 Mateu Morey
10 Nico Schulz
11 Dan-Axel Zagadou
12 Lukasz Piszczek
13 Nnamdi Collins
14 Maximilian Hippe
15 Felix Passlack
MIDFIELDERS
16 Jude Bellingham
17 Julian Brandt
18 Emre Can
19 Mahmoud Dahoud
20 Tobias Raschl
21 Giovanni Reyna
22 Jadon Sancho
23 Axel Witsel
24 Thomas Delaney
25 Taylan Duman
26 Immanuel Pherai
FORWARDS
27 Erling Haaland
28 Thorgan Hazard
29 Ansgar Knauff
30 Youssoufa Moukoko
31 Marius Wolf