Exeter City-in Reds rawltharte an chelh ding
Zirtawpni zan khan FA Cup third round-ah League Two club Exeter City chuan Liverpool an chelh dinga, Exeter khelmuala inkhelah goal hnih ve ve khungin an inhnehtawk.
Liverpool manager Jurgen Klopp-a'n player naupang zawk leh chhawr ngai loh a chhawr a, khualmualah tawnhriat nei tlem Liverpool player-te an talbuai teuh hle.
Mulaneitu Exeter-in Tom Nichols hmanga goal hmahruai an khung hnuah Reds tan Jerome Sinclair-a'n an si phurh sut mah se chawlhlawk hma hretin Exeter tan Lee Holmes-a'n corner aṭangin an hmahruaina goal a khung a, Reds player-te an hawihai.
Hun tawp nan minute 17 chiah a awm tawh tihin Reds tan Brad Smith-a'n an siphurh sutna goal a khung a, hun tawp thlenga goal dang lut tawh loin team pahnih an inhnehtawk.
Liverpool starting eleven ten tawnhriat an nei tlem a, an kum chawhrual hi kum 22 niin an vaiin tun season-a Reds tana an inlan tawh zat belhkhawm hi 34 a ni. Hei pawh hi vawi 21 khel tawh Christian Benteke khelh vang niin a lang.
Club tenau Exeter tan Reds an inhnehtawkpui hi result lawmawm a ni. Anfield-ah an inkhelh leh dawn avangin hlawkna an tel tur zat hi £700,000 a ni a, club tenau tan chuan sum tam tham tak a ni.
Liverpool manager Jurgen Klopp chuan, "Kha aia ṭha zawka khel thei kha kan ni a, inzirna tur tam tak kan la nei a ni. Exeter khelmualah khan khelh a harsa hle a, anni chu an khelh ṭhanna a nih avangin an tan a awlsam bik a ni. Match dang khelh leh kan ngai hi ka awih lo hial zawk a, mahse hei hi an duh dan a nih chuan Anfield-ah kan lo hmuak ang," tiin an khelmualah chak a tum hle.