Khel tha Aizawl FC-in Bagan hneh lo
Mizoram Premier League champion Aizawl FC-in Inrinni tlai khan 2015-16 season I League opening match an khel a, champion lai Mohun Bagan 3-1 in an hneh lo.
Mizo club zinga I League khel hmasa ber Aizawl FC hian khualmualah point hlawh chhuak lo mah se inelna tikimtu an ni ringawt lo tih an lantir a, game mawi an khelh miau avangin India rama football ngainatuten Mizo club hi an fak a, Kolkata-a Mizote'n an
ṭawiawm ṭha hle bawk.
Aizawl FC hian hian an match hnihnaah Salgaocar hnehtu Bengaluru FC chu January 16, Inrinni hian Rajiv Gandhi Stadium, Mualpuiah tlai dar 1:00-ah an hmachhawn ang.
Champion lai nge nge
Barasat Stadium-a inkhelah Bagan tana goal hnih khungtu Trinidadian striker Cornell Glen leh Punjabi striker Balwant Singh chu team pahnih danglamna an ni. Shillong Lajong striker hlui Glen hian ṭan aṭanga rei vak loah Aizawl FC keeper Soram Poirei tan hna a siam sak nghal a, minute 6-na lekah chiang zetin goal hmahruai a khung.
Aizawl FC-in minute 16-naah an si phurh an sut. Kawnpui winger Albert Zohmingmawia'n Mariners left back ṭha Dhanachandra Singh a patlang zarah Alfred Kemah Jaryan-a'n chance ṭha a nei a, Liberian forward-in goal zawnah pet lo mah se Bengali right back Pritam Kotal-a'n an lamah a tlawh lut.
MPL club-in khualmualah beiseinna nung nei chho mah se tlarhnung phui tawk lo an tuar a, minute 22-naah Balwant-a thawhrah Glen-a'n chiang zetin goal-ah a chantir. JCT youth system chhuak Punjabi forward hian minute sarih hnuah Aizawl FC defender Emma tihsual zarah Bagan goal thumna a khung.
Aizawl FC an talbuai a, amaherawhchu Spanish coach Manuel Retamero-a'n tlarhnung pawp tihphui nan Immanuel HS Lalṭhazuala aiah Ricky Lallawmawma a luhtir a, inkhel hmel hmang a dang.
Bagan aiin Aizawl FC-in goal khung theihna chance an ngah zui a, Mariners keeper Shilton Paul-a'n first half tawp dawn lamah Albert-a ball pet chu ṭha takin a dang a, Bengali keeper hian second half-ah hna ṭha tak a thawk bawk.
Second half-ah Aizawl FC-in I League champion lai Bagan player-te an kât kual a, a pawimawh ber goal erawh an khung thei lo.
Bagan defender Kinshuk Debnath-a'n an lamah a tilut teuh takzet a, hnai tak aṭangin captain R. Malsawmtluanga'n a pet goal lo a, substitute David Lalrinmuana corner pet a hlauhawm a, Albert-a'n chance
ṭha a hlah bakah Alfred-a ball pet chu Bagan defender-in a goal hmain an pet chhuak bawk.
Aizawl FC-in corner kick vawi 13 zet an hmu a, an khingpui Bagan-in corner kick vawi thum an pet. Ball possession 53% nei thei MPL champion Aizawl FC an khel ṭha tih a chiang a, chutihrualin minute 90 chhung thlir chuan Bagan tawnhriat neih tamna a lang.
Aizawl FC an chetṭhat hun hi Bagan-in goal thum an khung hnu, goal thun belh an mamawh tawh loh hnu a ni tih erawh hriat tel a ṭha awm e.
Tlarhnung pawp
Aizawl FC tlarhnung a phui tawk lo a, defence laia inkawp player thar Emma Chigozie leh Lalchhawnkima te'n match fitness an nei lo. Player pahnih hian training an nei dun tam lo a; right back Zuala a chefuh lo bawk. MPL aṭanga thlirin Lalramchullova leh Ronald Zothanzama te starting eleven-a an awm loin mak tih a hlawh - a thlaktu pahnih an che chhe dun hle.
Aizawl FC coach Manuel Retamero chuan, "Mohun Bagan hi hneh theih an ni a, amaherawhchu hneh tur chuan tihsual a thiang lo. Kan khingpuiten minute nga lekah goal an khung a, khami hnu kha chuan kan tan a harsa a ni. Second half-ah huaisen takin kan khel a, ka lawm khawp mai. Tlarhnungah insiamṭhatna tur kan ngah a, set piece hmang
ṭangkai turin kan zir uluk lehzual a ṭul bawk," tiin a sawi.
Mohun Bagan coach Sanjoy Sen chuan, "ISL khel player-te an rawn kir hnuah an theihna zawng zawng an chhuah loin ka hria. Pune City tana khel Pritam Kotal khan vawi khat pawh a tackle lo, chutihrualin Balwant Singh erawhin Cornell Glen a thlawp ṭha hle. Bagan tan Glen-a'n bul a ṭan ṭha a, nikuma a inkhel ka hmuh khan ṭha ka ti a, a khelh danah ka lawm hle a ni," tiin a sawi a; Aizawl FC khelh an harsat thu leh team ṭha an nih thu a sawi.
Champion lai Bagan hi Jeje Lalpekhlua bakah an star player dang pali vel tel loa khel an ni.