Aizawl FC Inkhel en man a hriat ta

Aizawl FC chuan January 16, Inrinni tlai dar 1:00 hian Rajiv Gandhi Stadium-ah Bengaluru FC an mikhual dawn. Mizoram club zinga I League khel hmasa ber Aizawl FC chuan ticket man tur an tichiang a, Bengaluru nena an inkhel tur ticket man hi Rs 200, Rs 500 leh Rs 1000 man a ni ang.

RG Stadium hi mipui 6000 lenna vela chhut a ni a, Rs 200 man hi gallery chung lam niin ticket 2800 vel siam a ni. Rs 1000 man ticket hi VVIP box bul chiahah a awm a, field aṭanga enna hnai ber stand chu Rs 500 man niin ticket 1800 vel zawrh chhuah a ni ang.

Aizawl FC general co-ordinator Michael Hmingthanpuia chuan, "Aizawl FC hian I League khel turin sum kan seng nasa a, hei hi ticket manto chhan a ni. Bengaluru hi club ṭha an ni a, Sunil Chhetri bakah Mizo panga an awm a, Aizawl FC nena an inkhel tur hi mipuiin an hlut ngei kan ring. Ticket man hi match tinah tih danglam theih a ni a, club dang kan khelh hunah chuan a ticket man hi a tlahniam ve leh ang," tiin ticket chungchang a sawi.

I League ticket hi Chhinga Veng YMA-in Thawhlehni aṭangin Millenium Centre kawt, Vanapa Hall kawt, Sikulpuikawn, Chanmari Kawn leh Chhinga Veng Waiting Shed (near ṬS Market) ah te an zuar dawn. Ticket leina hmunah hian Aizawl FC jersey zawrh a ni nghal dawn a, jersey hi puitling hak Rs 500 niin naupang hak Rs 400 a ni thung. Ticket chungchanga hriatchian duh nei chuan Chhinga Veng YMA president 9436140367 leh secretary (9862331353-ah te zawh fiah theih a ni a, ticket hi Thawhlehni aṭangin Chhinga Veng Hall-ah zan lamah a lei theih ang.