Sania Mirza leh Hingis an champion

Indo-Swiss pair Sania Mirza leh Martina Hingis te chuan kum duhawm tak an hman liam hnuah kum 2016 WTA season bul an ṭan fuh leh nghal a, Angelique Kerber leh Andrea Petkovic te ṭangdun hnehin Brisbane International title an chawi.

Inrinni zan inkhelah Mirza leh Hingis te ṭang dun hian minute 69 chhungin 7-5, 6-1 in hnehna an chang. WTA title a zawnin vawi ruk an chawina a ni.

Hmeichhe double world number 1 India chhuanvawr Mirza leh Swiss tennis player chuai thei lo Hingis te hian a zawnin match 26 chhung hnehna an chang tawh a, US Open, Guangzhou, Wuhan, Beijing, WTA Finals leh Brisbane International-ah te a zawnin an champion ta a ni.

Hingis chuan, "Kum 2015 kha hlim takin kan hmang zo tawh a, kumin bul kan ṭan dan pawh hi a hlimawm hle. Bul kan ṭan thar leh chauh a ni a, kawng thui tak zawh tur kan la neihah hian a ṭha thei ang bera khelh zel kan tum ang," tiin a sawi.