Final-ah Federer a chak lo

Seeded pakhatna Roger Federer-a'n beisei angin season bul a ṭan fuh tawk lo. Pathianni tlai khan Brisbane International final khelin seeded palina Milos Raonic lakah 6-4, 6-4 in a tlawm.

Canadian tennis player Raonic hi Brisbane International-ah a vawi khat champion-na chiah a ni.

Grand Slam vawi 17 champion tawh Federer hian final thleng turin match thumah hnehna a chang a, Grigor Dimitrov lakah set khat a hloh bak chu straight set vekin hnehna a chang. Mahse, final-ah erawh set khatmah a la lo thung.

Kum 34-a upa Federer hian a match hnuhung 11 aṭangin American John Isner leh world number 1 Novak Djokovic te pahnih bakah kum 25-a upa Raonic te a hneh lo a ni.