Man United vannei hram, Man City an chak chiang
Louis van Gaal-a hoten kum 2016-ah goal khung an la harsat reng a, Old Trafford-ah League One club Sheffield United laka minute 90 chhung goal an khung theih loh hnuah substitute Memphis Depay-a'n injury time-ah penalty a hlawh chhuak a, Wayne Rooney-a'n chakna goal ni turin goal-ah a chantir. Manchester United-in mualpho an pumpelh a, Dutch manager erawhin sawisel a hlawh zui.
FA Cup third round Inrinni zana inkhelah Manchester City leh Arsenal ten anmahni ang bawka Premier League club Norwich City leh Sunderland te awlsam takin an hneh a, nikum season-a club ṭha zinga chhiar tel Southampton erawh Crystal Palace hneh loin an tla nghal.
United = Boring
United leh an khingpui Sheffield inkarah club 47 zet an awm a, an inthlau tih a chiang. Ban mai tura sawi rik hman Louis van Gaal tan dinhmun sawh nghet turin chak a tawk lo a, chiang taka chak a ṭul.
Amaherawhchu United goal nawr a na tawk lo a, minute 45 chhungin goal an khung lo. Red Devils hian an khelmuala an match hnuhnung 10-ah a zawnin first half-ah goal an khung tawh lo. Sheffield United nena an inkhelh ṭum pawh hian Anthony Martial leh Wayne Rooney te chu goal khung tur khawpin an tal na lo a, German midfielder Bastian Schweinsteiger-a'n goal khung thei midfielder a ni lo tih a nemnghet zel bawk.
Kum hnih liam taa FA Cup semifinal thleng thei Sheffield United an ṭang rei thei a, 'giant killer' erawh an ni chhunzawm zel thei lo. Minute 60-naa lut Memphis Depay-a'n injury time-ah ṭha takin ball a la lut a, Sheffield defender Dean Hammond lakah penalty a hlawh chhuak. Hun pawimawhah Rooney a rintlak a, United an chak hram.
Manchester United manager Louis van Gaal chuan, "Sheffield United player tin kha an khel ṭha vek a, an tih tur ṭheuh an tih avangin an defender paltlang a har hle. Goal venhim hi attack aiin a awlsam a, chutichung chuan team ṭha zawk laka an khelh dan kha fak loh theih loh a ni. Keini lam pawh kan defence a ṭha a, tlarhma lam erawh kan insiamṭhat a ṭul a ni," tiin beisei an phak loh chhan chu an khingpuiten goal venhim chauh an ngaihtuah vang a nih thu a sawi.
Scholes bawk
United legend Paul Scholes a rawn ṭawng chhuak leh ta a, Louis van Gaal-a'n a naute a khelhtir danah a lungawi thei lo.
Midfielder ball sem thiam Scholes chuan, "Khelh ṭhat loh hi pawi an ti lo ni berin a lang. Old Trafford a kal apianga football khelh dan phung dik lo hmuh reng hi a ninawm tawh a ni. Player-te pawhin an khelh dan hi an ning tawh niin a lang a, phurna an nei lo. Ka hmuh dan tak chuan Van Gaal pawh hian a ning tawh niin ka hria a, field sirah nin hmel takin ṭhu mah se media hmaah chuan a hlim thu a sawi tho. A chang hi chuan player-te theihna phawkchhuak turin nawr ve deuh a ngai a, chuti lo chuan kan duh ang a thleng thei ṭhin lo," tiin United khelh dan chu a duh khawp loh thu a sawi.
Premier League-a panganaa awm mek United hian Old Trafford-a an match hnuhnung 10-ah goal 12 chiah an khung a, Scholes-a'n a lungawi loh chhan hi awmze nei a ni.
City an danglam
United-in goal khung an harsat laiin an ṭhenawm Manchester City erawhin khualmualah goal thum an khung a, goal an chhuah lo.
City-in Norwich City an hmachhawn ṭumin Sergio Aguero chuan minute 16-naah goal a khung a, Argentine striker hian minute 31-naah Nigerian rawlthar Kelechi Iheanacho goal khung tur a siam sak bawk. Manuel Pellegrini hoten inkhel an thunun a, minute 78-naah Kevin de Bruyne-a'n goal thumna khungin 3-0 in hnehna an chang.
Manchester City manager Manuel Pellegrini chuan, "Inkhelh ṭan tirh aṭangin chak duhin kan tui hal a, kan nawr na hle. Aguero goal a mawi em em a, ka lawmna tak erawh inhliam tam tak nei chunga inelna hrang hrangah champion beiseina kan la nei vek hi a ni," tiin an result-a a lungawi thu a sawi.
Nilaini zan hian City-in Premier League-ah Everton an mikhual dawn a, Thawhlehni zanah Manchester United-in relegation zone-a awm Newcastle hmachhawn turin St James Park an tlawh ang.
FA Cup Results
Exeter City 2 - 2 Liverpool
Wycombe Wanderers 1 - 1 Aston Villa
Watford 1 - 0 Newcastle United
West Bromwich 2 - 2 Bristol City
West Ham United 1 - 0 Wolverhampton
Hartlepool United 1 - 2 Derby County
Colchester United 2 - 1 Charlton Athletic
Peterborough 2 - 0 Preston North End
Newport County PSTP Blackburn Rovers
Arsenal 3 - 1 Sunderland
Birmingham City 1 - 2 AFC Bournemouth
Ipswich Town 2 - 2 Portsmouth
Sheffield Wednesday 2 - 1 Fulham
Brentford 0 - 1 Walsall
Bury 0 - 0 Bradford City
Southampton 1 - 0 Crystal Palace
Everton 2 - 0 Dagenham & Redbridge
Nottingham Forest 1 - 0 QPR
Eastleigh 1 - 1 Bolton Wanderers
Huddersfield Town 2 - 2 Reading
Hull City 1 - 0 Brighton & Hov
Norwich City 0 - 3 Manchester City
Middlesbrough 1 - 2 Burnley
Doncaster Rovers 1 - 2 Stoke City
Leeds United 2 - 0 Rotherham United
Northampton Town 2 - 2 Milton Keynes Dons
Manchester United 1 - 0 Sheffield United