FA Cup Awlsam takin Chelsea an chak

Pathianni zan FA Cup inkhelah team lian dang angin Chelsea-in an player ṭhate an chawlh hahdamtir ve lo a, Pathianni zan khan League One club Scunthorpe United chu 2-0 in an hneh.

Stamford Bridge-a inkhelah Chel-sea-in goal an khung hma a, inkhelh ṭan aṭanga minute 13-na lekah Diego Costa chuan Branislav Ivanovic ball cross ṭha tak chu awlsam takin goal-ah a chantir.

Scunthorpe tan goalkeeper Luke Daniels a khel ṭha a, Cesc Fabregas leh Pedro-te goal shot ṭha tak a dan hnuah Ruben Loftus-Cheek-a goal khung tur erawh a dang thei lo. Hun tawp thlengin goal dang a lut tawh lo a, awlsam takin Chelsea 2-0 in an chak.

Blues tan FA Cup?

Chelsea-in Premier League-ah 14-na dinhmuna an luah mek a, hmahruaitu Arsenal an phak lohna chu point 19 niin champion chu sawi loh palina dinhmun hauh tur pawhin an beih fe a ngai tawh ang.

Blues tan league kalkawng aiin Champions League kalkawng a awlsam chuang lo. London club hian last 16-ah French club ṭha Paris St-Germain an hmachhawn dawn a, Ligue 1-a roreltu club paltlang hi a hautak dawn.

Premier League leh Champions League lama an dinhmun thlirin Chelsea tan FA cup hi tun season-a nomawi an chawi theihna tura kawng awlsam ber niin a lang a, hei hi Chelsea boss Guus Hiddink-a'n a hai lo. Kum 2009-a Blues a enkawl hmasaka FA Cup chawitu manager hian FA Cup-ah a ti mai mai lo tih tilangin League One club lakah a player ṭha ber ber a chhawr a, awlsam takin an chak. Blues hian season hmasa khan fourth round-ah League One club Bradford chu 4-2 in an hneh lo a, tun ṭuma an hneh tak Scunthorpe nena an inkarah hian team 45 ngawt an awm.

Costa a inhliam

Chelsea striker season ṭan chhe tak, tun hnaia ngai awh chho leh mek Diego Costa chu hliam vangin minute 86-naah lakchhuah a ni. Blues manager Guus Hiddink chuan Nilaini zana West Brom nen league match an khelh hunah Spain international striker hi a chhawr theih a inbeisei lo a, a aiah French forward Loic Remy a hman a rinawm.

French forward Remy hi tun hnaiah Stamford Bridge chhuahsan tur anga sawi a ni a, Queen Park Rangers striker hlui hi Premier League club engemawzatin hel mekin amah duhtu zingah Tottenham Hotspurs chu thawm nei na pawl an ni.

Hiddink a thukhawchang

Chelsea manager Guus Hiddink chuan, "Kan result avang hian ka lawm hle. Premier League-ah chuan palina dinhmun luah tur pawhin kan beih fe a ngai tawh dawn a, FA Cup leh Champions League lamah hian kan rilru kan pek lehzual a ngai dawn a ni. Team ṭha tak lakah result duhawm tak kan hlawh chhuak a, a bik takin set piece-ah an hlauhawm thei hle. Bul kan ṭan ṭha a, a tawp lam erawh kan zuih deuh a ni," a ti.

Dutch manager chuan sawi chhun-zawmin, "Kan game khelh a rang em em a, mah se kan finishing erawh duhthu a sam lo deuh a ni. Ka player neih ṭhat dan berin ka khelhtir a, ka tisual loin ka hria. Nikumah team chhe zawka ngaih lakah an tlawm a, khatiang kha thlen nawn tir ka tum lo," tiin a player ṭhate a khelhtir chhan a sawi.

Scunthorpe boss a lawm lo

Mikhual team Scunthorpe striker Kevin van Veen chu box chhungah Blues midfielder Ramires-a'n a ti tlu a, penalty beisei mah se pek an ni lo.

Penalty pek an nih loh avangin Scunthorpe United boss Mark Robins a lawm lo a, "Penalty chiang tak a ni a, mah se Stamford Bridge anga in inkhel a nih chuan in duh ang thutlukna in dawng lo fo ṭhin," tiin club lian zawk chu referee-te'n an duhsak zawk ṭhin niin a ngai.

Scunthorpe boss chuan, "Inkhel ṭantir lamah kan talbuai deuh a, ball kan hloh hma em em. Mahse, a hnuah insiamṭhain goal khungna chance hial kan nei a, Loftus-Cheek khan kan beiseina a ti bo a ni," tiin referee chungah lungawi lo mah se a player-te khelh danah a lawm.