Barca leh Bayern ang nih duh Wenger

Arsene Wenger chuan Arsenal chu spanish club lian Barcelona leh German club ropui Bayern Munich ang maia champion nomawi chawi chak a tuihal turin a duh.

Arsenal hi Premier League match 20 khelh tawh aṭanga point 42 hmuin table-ah hmahruaitu an ni mek a; anmahni hnaih bertu Leicester City nen point hnihia inthlau mekin FA Cup-ah an nomawi humhim turin Sunderland chu 3-1 in anhneh a, fourth round an inpet kai bawk. Gunners hian Champions League-ah last 16 thleng bawkin an hmachhawn tur erawh champion lai Barcelona an ni thung.

Gunners hi Nilaini zan hian Liverpool khel turin an zin chhuak dawn a, January thla chhungin Stoke City leh Chelsea an hmachhawn zui dawn bawk. North London club hian hlawhtlinna chang tur chuan season chanve ṭha taka an hman ang hian season chawhnu lamah pawh an khelh ṭhat chhunzawm a ṭul dawn.

French manager Wen-ger chuan, "Bayern Munich leh Barcelona te hian kum tinin nomawi an chawi a, a chhan chu club lian an nih vang a ni. An player-te hi champion duh leh chakin an tuihal reng. Hlawhtlinna chang tur chuan player inhliam nei chung pawha hnehna chan zel a ngai. Tun thlaah inkhel hautak tak tak kan hmachhawn tawh a, hmabak pathum kan la nei bawk. Hengah te hian team ṭha kan nih leh nih loh chu a lang dawn a, ka naute hi an rilru put hmang a dik phawt chuan hnehna chang turin kan ṭha tawk a ni," tiin a sawi.