Messi anga thiam hi ka la hmu ngai lo - Turan

Barcelona midfielder Arda Turan chuan a team-mate Lionel Messi anga football thiam chu khawvelah a la hmuh ngai loh thu leh an la piang pawha a rin loh thu a sawi.

Turkey international Turan hi nipui transfer lai khan Atletico Madird aṭangin Nou Camp-ah a kal a, Catalan Club hi player naupang an lakluh dan fel lo vanga FIFA hram lai an nih avangin season chanve chhung chu an player thar hi an chhawr thei lo. Inrinni zan khan Barca hian Messi hat-trick hmangin Granada chu 4-0 in an sawp a, hemi ṭum hian Turan pawn a club tan a league match hmasa ber a khel a ni.

Kum 28-a upa Turan chuan, "Leo Messi anga inkhelh thiam hi ka la hmu ngai lo a, khawvelah ani ang hi chu an la piang lo ang. Ani hi chu Pathian hnen aṭanga lo chhuk mi danglam bik ang mai a ni," a ti.

Diego Simeone a enkawlna hnuaiah Turan hian kum 2013-14 season khan Atletico Madrid chu La Liga title a chawi pui a, Champions League final-ah Real Madrid lakah an vanduai bawk.

Turan chuan Barcelona a zawm chhan sawi langin, "Coach Luis Enrique hian a hnena kal turin min duha, a chhan chu khelmual chhungah ball ka ken theih vang leh ka thawhrim ṭhin vang a nih thu min hrilh. A duhdan ang ngei a khelh chhuah ka tum a, title tam zawk kan lak theih nan ka theihtawpin ka bei zel ang," tiin a sawi bawk.