FA Cup Spurs leh Leicester an inhnehtawk
FA Cup fourth round luh inchuha Tottenham Hotspur leh Leicester City inkhelah chak zawk an awm lo a, Pathianni zan khan team pahnih hi goal hnih ve ve khungin an inhnehtawk.
White Hart Lane-a inkhelah Spurs tan Christian Eriksen chuan minute riatna lekah goal khung mah se Foxes-in Marcin Wasilewski leh substitute Shinji Okazaki hmangin an chhanglet.
Minute 88 thleng goal dang a lut tawh lo a, khualmualah Leicester an chak mai dawn niin a lang hman. Mahse, minute 89-naah Spurs-in penalty sawisel kai an hlawh chhuak a, Harry Kane chuan goal-ah a chantir. Goal dang a lut tawh lo a, Leicester khelmuala inhmachhawn leh turin team pahnih an inṭhen.
Penalty a ni em?
Spurs penalty hlawh-chhuah hi sawisel theih a nih rualin referee thu-tluknaah thui takin a in-nghat. Leicester player Nathan Dyer chu penalty box chhungah Danny Rose nen an innek a, ball lo kalin a kut fuhin penalty a chawi.
England striker hlui Alan Shearer chuan, "Referee thutlukna kha a dik lo. Dyer khan ball awm-na pawh a hre lo a, thu-tlukna ṭha lo tak a ni," a ti.
Republic of Ireland manager Martin O'Neill chuan, "Nathan Dyer khan ball awmna pawh a hre lo a, referee khan dik lo takin penalty a pe a ni," a ti bawk.
Vardy mamawh lo Foxes
Leicester City-in tun season-a che ṭha tak an striker Jamie Vardy an chhawr thei lo a, an player rinrawl Riyad Mahrez an chawlh hahdamtir bawk.
Mahse, Foxes-in an khel ṭha a, Spurs tlar-hnung an chhaih buai ngun hle. January transfer-a Birmingham aṭanga pound maktaduai 3.7-a an lei Demarai Gray a khel ṭha a, yard 20-a hla aṭangin Foxes tana a match hmasa berah goal a khung teuh nghal hle.
Second half aṭang-a khel ṭan Shinji Okazaki a hmuhnawm a, Japanese forward hian goal khat a khung bakah Spurs tlarhnung chhaih mang-angtu a ni.
Tottenham-in inkhelh ṭan tir lamah Harry Kane leh Dele Alli-te luhtir lo mah se si an phurh hnuah an player pawimawh pahnih hi an tlan luh tir a, an tisual lo.
Eng nge an sawi?
Tottenham manager Mauricio Pochettino chuan, "Inelna pawimawh takah draw result kan hlawh chhuak a, kan khelh dan ngaihtuahin ka lawm a. Draw hi result fair tak niin ka hria. Minute 90 chhunga kan khelh dan en chuan chak kan phu zawk hial a ni," a ti.
Leicester City mana-ger Claudio Ranieri chuan, "Penalty kha ka lo en lo a, sawi theih ka nei lo. Referee-in penalty ni ngeia a ngaih avangin penalty a pe a, chuti a nih chuan sawisel theih ka nei lo. Kan khelh danah ka lawm a, tun hnaia khel ngai lo player pariat ka luhtir chungin result ṭha tak kan hlawh chhuak a ni," tiin an result-ah a lawm.