Robin Singh-a hmalam hun a chiang lo

Tun hnaia Indian football titi luah nasa ber pawl chu India international striker Robin Singh a ni. Season hmasa I League-a Bengaluru FC striker hian Bangalore club pre-season training hi zawm ren rawn mah se Indian Super League lama a khelhna Delhi Dynamos-in phalna la loa an player chhawr tumah Bangalore club an puh. Uttar Pradesh striker hi SAFF Cup-a a inhliam avangin a inenkawl mek a, a hmalam hun a chiang lo.

January 16-a Aizawl-a inkhel tur Bengaluru lamin Delhi Dynamos hi chhanglet duh lo mah se hetianga an buai hma khan ISL club hi thawhpui harsa an tih thu an lo sawi tawh. Blues (Bengaluru sawina) ho hian ISL ṭan a nih dawn khan an player engemaw zat an chhuah zalen a, India captain Sunil Chhetri leh Thoi Singh-te kha chu ISL lama an khelhna club nen loan-a in pe kir leh turin inremna an neihpui thlap. Dynamos erawh hetiang inremna hi an neihpui lo niin a lang a, an player ang maia pre-season training nei tura Robin Singh an ko hi Delhi Dynamos lam hian an ngai thiam lo niin a lang.

Bengaluru chief technical officer Mandar Tamhane chuan, "Robin Singh chungchangah hian Delhi Dynamos hi vawi tam email kaltlangin kan dawr tawh a, chhanna kan hmu ngai lo. ISL hruaitute lam hial pawh kan rawn a, mah se Delhi lam hian indawr hrim hrim an duh lo niin a lang," a ti.

English manager Ashley Westwood-a enkawl Bengaluru FC lamin Delhi Dynamos hi thawhpui harsaah puh mah se Delhi club erawh an dinna ngaiah an ding a, Robin Singh chu an player a nih mai piah lamah Bangalore club lama chhuahtir chu an bat a nih loh thu an sawi.

Delhi Dynamos chuan, "Benga^-luru FC hian phalna nei loin kan player hi inbiakna an neihpui a, FIFA dan an bawhchhia a ni. Robin Singh hi Delhi Dynamos player a ni a, keini chuan kan player hmalam hun zel ngaihtuah chunga thutlukna siam hi kan titur a ni. Sum duh vang ringawta loan-a chhuahtir kan tum lo. Robin hian ram pawn lama khelh a duh thu min hrilh a, kan player duhna hi kan ngaihtuah sak a ngai a ni," tiin an player tana ṭha tur chiah an ngaihtuah thu an puang.

Roberto Carlos-a enkawl Delhi club chuan, "Tunah hian kan club chuan Robin Singh-a khelhna turin Australia, New Zealand leh Scandinavian club ṭhenkhat kan dawr mek a, an club-a khel tura Robin duhtu hi engemawzat an awm a ni," tiin Indian striker chu Bengaluru lama kaltir ai chuan ram pawn club lamah khelhtir an tum zawk.

SAFF Cup-a India leh Sri Lanka an inhmachhawn ṭuma inhliam Robin Singh hmalam hun a chiang lo a, Indian football kalphung mumal loin player lamah pawh nghawng a nei zel dawn niin a lang. Bengaluru FC hian January 16 hian RG Stadium, Mualpuiah Aizawl FC an hmachhawn dawn. 2014 I League champion hian Mizo player panga an nei a, India junior team captain Daniel Lalhlimpuia chu inhliam vangin rawn tel theih beiseiawm lo mah se MPL champion Aizawl FC hmachhawn tur hian Mizo pali Lalthuammawia, Lalchhuan-mawia Fanai, Beikhokhei Beingaichho leh Malsawmzuala te chu matchday squad-ah an awm ngei beisei a ni.