La Liga hmahruaitu Atletico Madrid

Atletico Madrid-in La Liga-ah hma an hruai zel a, Pathianni zan khan Celta de Vigo chu 2-0 in an hneh a; League match 19 khelh tawh aṭangin Atletico hian point 44 an hmu a, pahnihnaah match 18 khelha point 42 hmutu Barcelona an awm thung.

Celta Vigo-a inkhelah team pahnih ten first half chhungin goal an khung lo a, second half minute 49-naah Antoine Griezmann chuan Atletico hmahruaina goal a khung. Hun tawp hma minute 10 chauh a awm tawh tihah Yannick Carrasco chuan an goal hnihna a khung bawk a, goal dang a luh tawh loh avangin Diego Simeone-a nau ten khualmualah point thum an hlawh chhuak.

Atletico forward Griezmann hian tun season-ah a club tan inelna hrang hrangah goal 14 a khung tawh a, league-ah bik goal 10 a khung tawh. La Liga-ah a club tan chakna goal vawi sarih a khung tawh a, tun season-ah ani aia record nei
ṭha an awm rih lo.

Tun season league khelh mekah Atletico hian goal riat chiah an la chhuah a, an keeper Jan Oblak hian match 12 chhung goal a chhuah lo tawh a, European league lian panga zingah Inter Milan keeper Samir Handanovic nen record nei ṭha ber an ni mek.

Atletico manager Diego Simeone chuan, "Inkhel ṭan aṭanga minute 20 chhung kha chu kan buai tih phat rual a ni lo. Mahse, a rei tawlh tawlh a game kan thunun theih bakah kan mamawh zat goal kan khung bawk. Hnehna kan chan avangin Nilaini zana Rayo Vallecano nen Copa del Rey kan khelh hunah pawh inrintawkna sang tak nen kan lo mikhual thei dawn a ni," a ti.

League hmahruaitu Atletico hi January 30 hian Barcelona khel turin Nou Camp-ah an leng lut ang.

Chak thei lo Neville

Gary Neville-a'n a club thar Valencia chu La Liga-ah chak ni hmel a la hmuh pui thei lo tluang zel a, Pathianni zan khan Real Sociedad lakah 2-0 in an tlawm. Match 19 khelh tawh
aṭanga point 23 hmuin table-ah 11-na dinhmun an luah mek.

Real Sociedad khelmual Anoeta Stadium-a inkhelah team pahnih an inbei tawk a, ball possesion pawh 50-50 a ni. Mahse, hun tawp hnaih lamah mualneitu Sociedad tan Brazilian striker Jonathas de Jesus a rawn inlar a, ani hian minute 79 leh 82-ah he inkhela goal lut pahnih hi a khung a ni.

Manchester United leh England defender hlui Neville hian Spanish club a enkawl hnuah league-ah bik vawi hnih a tlawm pui tawh a, vawi thum chu an khingpuite nen inhnehtawkin chakni hmel a la hmuh pui lo. Champions League-ah French Ligue 1 club Lyon lakah 2-0 a an tlawm tawh bawk avangin inelna hrang hrangah vawi thum a chak loh puina chiah a ni bawk.

January transfer chhunga player thar lak a tum leh tum loh an zawhna chhangin Neville chuan, "Ka hna pawimawh hmasa chu player thar lei a ni lo a, kan squad-a a ṭha awmkhawm sa ho hi ṭha taka khel chhuak thei tura siam rem a ni zawk. Ka player neihsa te hi hnehna chang thei turin an ṭha tawk a, ka ringtawk a ni," tiin a sawi.

Valencia hian an league match lehpekah chuan table hnuai ber dawta awm mek Rayo Vallecano chu January 17 khian an hmachhawn leh ang.