League Two club hneh loin Swansea an tla

Premier League club Swansea chu League Two club Oxford United 3-2 a hneh loin FA Cup third round aṭangin an tla.

Pathianni zan inkhelah Swansea tan Jefferson Mon-tero leh Bafetimbi Gomis ten goal an khung a, mualneitu Oxford tan Kemar Roofe-a'n goal hnih a khung bakah Liam Sercombe chuan goal khat a khung ve bawk.

Oxford khelmual Kassam Stadium hi mipui 12,500 lenna ni mah se Swansea nena an inkhel en tur hian mipui 11,600 ngawt an pungkhawm a, an player-te an au phur a, an inpekna a thlawn lo. Kum 2013-a Luton-in FA Cup third round-ah Norwich an hneh hnuah Oxford chiah hi fourth division club zingah Premier League club hneh thei an la awm.

England-ah khan football inelna league chhawng riat a awm a, a sang ber chu Premier League (level 1, 20 team) niin an hnuaiah hian Championship (level 2, 24 team), League One (level 3, 24 team), League Two (level 4, 24 team) te an awm. Anni pali hnuaiah hian level pali an la awm chhawng leh a ni.

Oxford manager Michael Appleton chuan, "Season
ṭan tirh aṭang khan hetiang hun lawmawm hi kan thleng thei tih ka sawi lawk tawh. Premier League club hneh thei turin theihna kan neih bakah ka player zingah hian league sang zawka khel phak pali vel an awm thu ka lo sawi tawh bawk. Tunah a chhanna chu kan hmu fiah tain ka hria, hlauhna tel loa kan khel zel a nih chuan round sang zawk pawh kan la thleng thei ang," a ti.

Swansea manager lailawk Alan Curtis chuan, "Oxford khan chak an phu zawk. Kan result avangin kan lungngai em em a, amaherawhchu Nilai zana Sunderland nen kan inkhelh hunah hei hian nghawng a neih loh hram ka beisei," tiin a sawi.

Tun dinhmunah Swansea hi Premier League-ah 17-na an ni mek a, relegation zone aṭangin point hnih chiahin an him mek a ni.