Serie A Champion lai Juventus an sang tual tual
Italian Serie A champion lai Juventus-in season bul ṭan fuh lo hle mah se tun hnaiah erawh club lian zia an chhuah leh tawh a, Pathianni zan khan Sampdoria chu 2-1 a hnehin a zawnin league-ah match kaw chhung hnehna an chang ta. Inkhel dangah Napoli chuan 5-1 a Frosinone sawpin league hmahruaitu an ni.
League match 19 khelh tawh aṭangin Juve hian point 39 hmuin table-ah pahnihna an ni a, hmahruaitu Napoli chu point hnih chiahin an phak lo mek.
Juve tan hian midfielder Paul Pogba chuan minute 17-naah goal hmahruai a khung a, nipui tranfer laia Real Madrid aṭanga Turin club zawmtu Sami Khedira chuan minute 46-naah an goal hnihna a khung bawk. Goal hnih an phurh hnuah Sampdoria tan Antonio Cassano-a'n goal khat a khung ve a, goal dang erawh a lut tawh lo. Sampdoria centre back Niklas Moisander chu hun tawp hnaih lamah hnawhchhuah a ni.
Juve manager Massimiliano Allegri chuan, "Tun season-ah Sampdoria laka kan khelh anga ṭha khan kan la khel ngai lo. Player tinte an khel ṭha em em a, a team puipui pawh kan khel ṭha hle. A zawna match kaw chhung hnehna chan hi thil awlsam a ni lo a, hetiang ti thei tura ka naute an khel chhuak thei hian min ti lawm hle. Kan thlenchinah kan duhtawk mai tur a ni lo a, kawng thui tak zawh tur a la awm," a ti.
Player thar lakluh an tum thu sawiin Allegri chuan, "Kan team ti chak thei tur player ṭha bik kan hmu thei a nih chuan lakluh kan duh a, kan mamawh bawk. Position hrang hrangah player
ṭha tak tak kan nei a, mahse neih belh chu duhthusam a ni," a ti.
Tun hnaiah Juve hi Borussia Dortmund star Ilkay Gundogan leh Sevilla player Ever Banega te nen sawi zawm an ni mek.
Hmahruaitu Napoli
Napoli tan striker Gonzalo Higuain a vul zel a, Frosinone lakah goal hnih a khung leh ta. Napoli tan Raul Albiol, Marek Hamsik leh Manolo Gabbiadini ten goal khat ṭheuh an thawh ve bawk a, Inter Milan leh Fiorentina lehpelin league hmahruaitu an ni.
Argentina international Higuain hian tun season-ah a club tan inelna hrang hrangah goal 20 a khung tawh a, kum 1989-90 hnua league title la chawi leh lo Napoli chu beiseina a siam sak mek.
Inter an tlawm
San Siro Stadium-a inkhelah Roberto Mancini team leh Sassuolo te goal awm loin an inhentawk mai dawna a lan laiin minute 95-naah Inter Milan defender Joao Miranda chuan Gregoire Defrel a tihtluk vangin penalty a chawi.
Italy Under 21 forward Do-menico Berardi chuan penalty
aṭangin goal awmchhun a khung a, Inter hi tun hnai an league match hnuhnung parukah vawi thum an tlawmna chiah a ni.
Inter manager Mancini chuan, "Goal khungtumin vawi 21 ngawt kan pet a, mahse Sassuolo goal keeper kha kan ngam lo a ni. Point khat tal chu hmuchhuak tur chu kan niin ka hria, penalty kha chu thil thleng palh ve mai a ni a, inkhel pumpui thlir chuan point hmuh chu kan phu ve hle chuan ka hria," tiin a sawi.