Van Gaal buaina belhchhah thei tur Newcastle

Zanin dar 1:15 hian St James Park-ah Newcastle United leh Manchester United an inkhel dawn a, League One club Sheffield United hneh hramtu Red Devils tan zanin Premier League match hi a pawimawh hle.

Manchester United-in Old Trafford-a an match hnuhnung 10 first half-ah goal an khung lo a, an khingpui tur Newcastle United hian an match hnuhnung paliah goal an khung lo a, 1-0 vekin an chak lo. Club pahnih record thlirin zanin inkhel tur hi goal luh tam beiseiawm lo mah se manager Louis van Gaal leh Steve McClaren te hmalam hun hril thei tur a nih dawn avangin inkhel boruak a sang ang.

Tla thei Newcastle

Premier League kaithar Watford-in Newcastle United chu Inrinni zan khan FA Cup aṭangin an pet chhuak a, Magpies hi Premier League lamah pawh an dinhmun a him lo. McClaren-a hote hian match 20 khelh tawhah point 17 hmuin 18-na dinhmun an hauh mek.

English manager McClaren chuan, "FA Cup-a kan result kan theihngilh ang a, Thawhlehni zana Manchester United chauh kan ngaihtuah tawh ang. Vawi leh khata hmasawn vak a theih loh a, kan tum tur chu goal chhuah loh leh goal khung a ni," tiin Watford an hneh loh zawhah a sawi.

Club neitu Mike Ashley hian 2007-ah Newcastle hi a lei a, supporter ruhkawl Toon Army nen an inhmu thiam lo a, club pawhin result ṭha an nei ngai lo. Ashley hnuaiah Premier League aṭangin Newcastle vawi khat an tla tawh a, top 10-ah vawi hnih chiah an lang bawk.

Tun hmaa Premier League club ṭha Newcastle hi club naran an ni tawh a, tun dinhmunah phei chuan minute 412 chhung goal an khung tawh loh avangin Newcastle hmalam hun a thim a, result a chhiat zel chuan manager McClaren hian a hna hi a chelh rei tawh lo ang.

Van Gaal ve thung

Manchester United-in inelna hrang hrang match 17-ah goal 22 chiah an khung a, goal an khung theih loh bakah goal chance an insiam theih loh ṭhin avangin manager Louis Van Gaal-a'n sawisel a tawk nasa hle.

United legend Paul Scholes chuan season ṭantirh aṭanga tun thlengin Van Gaal-a hnuaia United khel a la sawisel char char a, result ṭha an neih loh bawk avangin Dutch manager hi Red Devils ṭantute zingah ban duhtu an tam tawh hle.

Van Gaal chuan FA Cup-a Sheffield an hneh zawhah, "A pawimawh ber chu fourth round luh a ni a, kan tum kan thleng a ni," tiin goal khung tam leh game mawi aia result a pawimawh thu a sawi.

Dutch manager hian a theih chin chinah player-te chhan mah se tlarhma lama club innghahna captain Wayne Rooney leh Anthony Martial te'n khelmualah goal hmangin an manager an chhan let thei tlat lo. Van Gaal hnuaiah United-in nikum December thlaah chak result an nei lo a, kum 2016-ah erawh Swansea leh Sheffield United an hneh a, Newcastle laka point thum an hmuh theih chuan Dutch manager sawiselna tam zawk a kiang ang.

United hi Newcastle nena an match hnuhnung 27-ah vawi 18 an chak a, vawi thum an chak lo. St. James Park bikah chuan an match hnuhnung pathumah an chak vek a, a belhkhawma an chakna zat chu 8-0 a ni.