Germany-a Mizo naupang tir turin U Dream hotupa Aizawlah lo kal
Bundesliga club TSG 1899 Hoffenheim hnuaiah Mizo naupang-te'n training an nei thei dawn a, kumin kum tir lamah Mizo naupangte'n Germany-ah football an zir thei dawn e.
Mizo naupangte Germany-a football zirtir tura tirtu tur, U Dream-a an hotupa Supratik Sen chuan nimin khan Aizawl a lo thleng a, Mizo naupang eng emaw zat kumin kum tir lamah Germany-ah football zir tura tirh a tum thu Mizoram Football Association hruaitute a hrilh.
Supratik Sen hi Unilazer Sports-a CEO a ni a, 'U Dream' tih hi Unilazer Sports hnuaia an project pakhat a ni. He project hnuaiah hian Indian naupang 60 vel zet chu Germany-a TSG 1899 Hoffenheim hnuaia training tura tirh an tum a, tunah hian naupang 17 chu Germany-ah hian training-in an tir mek a ni. Germany-ah hian football zir pahin lehkha an zir ang a, naupang kalna senso zawng zawng hi Unilazer Sports hian an tumsak vek a, kum ruk chhung training pek an tum a ni.
Tunah hian India ramah U Dream Exce-llence Centre din tumin an buaipui mek a, Mizoramah hetiang football zirna tur hi Mizoram Football Association nen ṭang-kawpa din dan tur an ngaihtuah mek bawk a; anni hian German football coach-te leh local football coach-te nen tangkawpin ṭan lak an tum a ni.
Germany-a naupang an tirhte senso hi kum khatah cheng nuai 70 vel a ni a, tunah hian nikum lama an thlan chhuah tawh Mizo naupang 15 zinga naupang panga an ko tawh a, passport leh tihfel ngaite an tihfel zawh theih chuan March-ah hian Germany-ah tirh an tum dawn a ni.
Supratik Sen hian nimin khan Lammualah MFA Grassroots training a en a, tuna batch tharte hak tur jersey thar chu naupangte a sem bawk a, "MFA nen ṭha taka thawhho kan duh a, kan hmalamah hian beiseina sang tak kan nei a ni," tiin a sawi.
Unilazer Sports hian footbal mai bakah infiamna dang pawh an enkawl tho a, sum tamna Star Sports Pro Kabaddi League-a champion lai Mumbai team hi an ta a ni a, moto sports lamah pawh hnuhma lian tak an nei a, a company neitu chu mi hausa tawntaw Ronnie Screwvala a ni.