East Bengal chakna Ranti Martins

Pathianni tlai khan East Bengal-in tun season I League match hmasa berah Sporting Clube de Goa an hmachhawn a, Fatorda Stadium-ah goal chhuah hmasa zet mah se Ranti Martins goal hnih hmangin 3-1 in khualmualah hnehna an chang.

Season liam taah Mohun Bagan an champion a, East Bengal hian an hmelma Mariners-in I League nomawi an chawi tawh laia vawi khat mah an la champion ve lo hi an hrethiam lo. Champion ngei tumin Bagan defender Bello Rassaq leh midfielder Sehnaj Singh te bakah Shillong Lajong keeper Rehenesh TP te an la lut a, South Korea forward Do Dong-hyun chuan I League khelh hma hauhin 2015 Calcutta Football League an champion-na kawngah goal 12 a khung bawk.

Red & Gold brigade hian foreigner palina atan Chennaiyin defender Bernard Mendy an la lut hnai niin sawi a awm bawk.

East Bengal match hmasa berah Mizo tlangval Robert Lalthlamuana chu captain a ni a, ani bakah hian S. Malsawmtluanga'n starting eleven a chang bawk. Red & Gold Brigade aiin mualneitu Goan club-in bul an ṭan ṭha a, I League player zinga hlawh tam bera an chhal ṭhin Odafa Okolie-a'n minute 29-naah goal hmahruai a khung.

Second half-ah foreign player ṭha bawk an langsar a, Nigerian striker Ranti Martins chuan goal hnih a khung bakah Sikkim lam chhuak midfielder Bikash Jairu goal khung tur a siamsak bawk. East Bengal hian minute 81-naah goal thumna hi an khung a, hun tawp thlengin harsatna an nei tawh lo.

Lajong leh Mumbai

Inhnehtawk

Inkhel pakhat zawkah Shillong Lajong-in an mikhual Mumbai FC chu Jawaharlal Nehru Stadium, Shillong-ah goal awm loin an draw.

Lajong tan East Bengal leh Kerala Blasters FC tana khel tawh Nigerian forward Penn Orji-a'n chance ṭha a hlah nghal a, Mumbai FC forward Eric Brown chu Lajong defender tan a hnawksak bawk. Liberian forward Brown hi nikum I League 2nd Division-ah khan United SC player pawimawh a ni.

Khualmuala khel mah nise Mumbai FC-in season liam taa Lajong defender pawimawh Min-Chol Son an kawl a, North Korean defender hi Lajong Brazilian forward Uilliams Bomfim Souza te'n an paltlang thei lo.

Mizo player tamna ṭhin Shillong Lajong starting eleven-ah Mizo an awm lo a, minute 88-naah Lalrammuana'n Brazilian forward Uilliams a rawn thlak a, inkhel result erawh a danglam phah lo. Mizo rawlthar Rammuana hi Ramthar Veng, Aizawl a cheng a ni a, India Junior team tana pawha khel tawh niin Lajong youth system chhuak a ni.

Tun season I League round hmasa ber khelh zawh a ni a, team kua an awm avangin DSK Shivajians an la inlan lo. Champion rinkai Mohun Bagan, East Bengal leh Bengaluru te an chak vek a, chutihrualin match khat chauh an la khelh avangin team ṭha fal emaw chhe fal tiha sawi tur an la awm lo, round khatna aṭanga a lan dan chuan foreign player ṭha bik chu I League club danglamna a ni.