Klopp-a'n Guardiola a vau lawk!

Liverpool manager Jurgen Klopp chuan tun hnaia England pan a tum thu sawitu Bayern Munich manager Pep Guardiola chu a hna a awlsam dawn loh thu a hrilh.

German coach chuan, "England-ah chuan inkhelh tur a tam em em a, Germany leh England-in an lohna ber chu match khelh tur a tam lutuk hi a ni," tiin Guardiola chu inveng lawk turin a hrilh.

Kum 44-a upa Guardiola hian season tawpa a contract a zawh rualin Allianz Arena chhuahsan a tum a, Spanish manager hi Manchester City, Chelsea leh Manchester United-te nen sawi zawm nghal a ni.

Klopp chuan, "England ka rawn pan tirh khan Capital One Cup semifinal-ah second leg an khel ṭhin tih pawh ka lo hre lo. Stoke City 1-0 a kan hneh khan Germany-a ka ṭhian ṭhenkhat chuan final kan lut tawh emaw an lo ti hmanhmawh a ni," a ti.

Borussia Dortmund boss hlui chuan Guardiola chu a buai phah a rin chuan loh thu sawiin, "Manager tawnhriat ngah tak a ni a, a insiamrem thei maiin ka ring. Player ṭha tak tak leiin team ṭha tak a din ang tih ka chiang a ni," tiin Germany-a a lo hmachhawn tawn ṭhin manager chu a fak.