Arsenal chakna Trossard-a goal mawi

Premier League champion tum Arsenal chuan Pathianni zan khan substitute Leandro Trossard-a goal mawi hmangin Everton 1-0 in an hneh a, point thum hlu tak an hlawh chhuak.

Pathianni zan Goodison Park-a inkhelah Everton lamin tlarhnung an rem phui ṭha viau a, point hmuh ngei pawh an tumruh, mahse minute 90 chhung inkhel thununtu Gunners lakah an ṭang zo lo - tlahniam thei dinhmunah an ding chhunzawm.

Insiksawina

Mikel Arteta-a'n season an ṭan hma khan tumah inkhel bul ṭan tura chiangsa an awm bik loh thu a sawi a, player a thlan danah a thusawi hi a takin a lantir chhunzawm tih kan hmu zel.

Goalkeeper Aaron Ramsdale aiah David Raya chuan si ban a nghak a, striker Gabriel Jesus dam tawh mah se Eddie Nketiah-a'n bul ṭanin Kai Havertz aiah Fabio Vieira chu a tirah a lut bawk a, midang erawh a lut ṭhin pangngaite an ni.

Forward Gabriel Martinelli-a chu hma takah a inhliam, Brazilian international hi eng chena rei nge a chawlh dawn a hriat loh, amah thlaktu Trossard chu danglamna siamtu a ni ta a ni.

Goal khat

Inkhel tir lamah mual sir lama hlauhawm ṭhin tak Martinelli-a'n goal a khung nghal, mahse VAR hmanga ennawn a nih hnuah ball pe chhuaktu Nketiah chu a lo offside avangin an goal hmasa hi an hnawlsak.

Ball chang tam mah se Arsenal lamin a hmawr an bawk thei lo, season hmasa khan Sean Dyche-a'n Everton a enkawlna inkhel hmasaah North London club hi mikhualin an hneh a nih kha, hmachhawn dan a thiam riau.

Mahse, Spanish manager Arteta-a'n player a nih laia rei tak chhung hun a hman tawhna Goodison Park luhchhuah ngei a tum thung, minute 69-naah an duh leh mamawh chhanna chu an hmu.

Captain Martin Odegaard leh Bukayo Saka ten fing taka ball an inpek hnuah box chhunga awm Trossard chuan laklawh nei miah loin a khung - Saka hnen aṭanga a ball hmuh hi vawi khatah a pet lut nghal - chak nan a tawk.

Arteta a lawm

Goodison Park an tlawh hnuhnung panga zinga paliah Arsenal an tlawm a, tunah chuan chak an harsatna hmun ni ṭhinah hnehna an chang ta a, hmun danga an chak nen point inzat mah se a lawmawm bik ngei ang.

Arteta chuan, "He hmuna hnehna kan chan lohna a rei ta hle. Kan khel ṭhain inkhel kan thunun hneh hle a, harsatna min siamsak loin kan khingpuite kan dah thei, goal lut hi hei aia tam zawk tur niin ka hria.

"Manchester United kan hneh khan ka lawm a, a hlimawm pawh ka ti. Tuna kan chak erawh a lawmawm dan a danglam, hmabak hlen tur pakhat kan neih chu an hlen chhuak niah ka ngai," a ti.

Arsenal hian hun rei tak hnuah Champions League an khel leh dawn a nih kha, tunah chuan September 20, Nilaini zana Dutch club PSV nen UCL group match an khelh tur atan rilru an pe thei tawh ang - Emirates Stadium-ah mikhual an thleng dawn.

Everton buaina

Hamrik hnuhnung ber a rik hmain Everton ṭantu tam tak chuan stadium an chhuahsan a, a tawp thlenga awm ṭhenkhat chuan an player-te an auel hial bawk - Dyche enkawl team hian an beisei angin an khel lo.

Tun season EPL match vawi nga an khelh tawhah Toffees hian chak ni hmel an la hmu miah lo a, point khat chauh an la neih avangin season hmasa ang khan table mawng lamah an buai leh dawn niin a lang.

Arsenal an mikhual hma deuh hian Everton neitu Farhad Moshiri chuan club neitu a nihna zinga 94% chu American investment fund 777 Partners hnena hralh a remtih thu a sawi a, thutlukna hian fans lam lu a tihai rih hle niin a lang bawk.

Ni danga thawm bengchheng chhuah ṭhin Everton fans an bengchheng tawk lo. Dyche chuan, "Season hmasa lama buaina kha kan la chingfel lo, hnathawh tur a tam hle," tiin team indinthar an ngaih thu a sawi.