Ramsdale ka thlak dawn lo - Arteta
Arsenal manager Mikel Arteta chuan Everton laka England goalkeeper Aaron Ramsdale a chhawr loh chhan chu David Raya hmanga thlak a tum vang a nih loh thu a sawi a, keeper ṭha tak pahnih a neih avanga a inchhawka a chhawr a ṭul thu a sawi bawk.
Arteta chuan, "Fabio Vieira khelh chhan nen emaw Gabriel Jesus aia Eddie Nketiah luh chhan nen a inang reng. Jesus hi kan club pumpuiah, keimah pawh tiamin, ani aia trophy chawi hnem zawk kan awm lo. Mahse, chuti chung chuan eng vanga bul ṭantir lo nge kan nih, tih chungchangah zawhna ka dawng lo reng reng.
"Player pahnih ṭha tak nei chungin, tu emaw zawk inkhel loa dah reng kha ka ti thei lo. David hian Aaron ang thoin quality sang tak a nei a, Karl Hein pawh a ni tho - kan hman ve a ṭul hun a awm ṭhin," a ti a, Everton laka Raya-a'n goal a ven chhan a sawi.
David Raya hian nipui transfer-ah Arsenal hi Brentford aṭangin loan-in a zawm a, tuna Arsenal first choice ni lai Ramsdale hian season hmasa khan Gunners league match 38 a khel vek thung.
Season hmasaa Premier League nomawi chawi thei dinhmuna ding hman hial Arsenal hian 2016-17 season hnua a vawi khat nan tun season-ah Champions League an khel dawn a, Nilaini zan dar 12:30 hian an match hmasa berah PSV Eindhoven an mikhual ang.
Arteta chuan Ramsdale leh Raya chu a inchhawka a chhawr zel tur thu sawiin, season hmasaah te pawh khan inkhelh laia keeper thlak châk chang a neih thu a sawi!
Spanish manager chuan, "Ka châk ṭhin a, mahse, ti tura huaisenna ka nei lo zawk a ni. Mahse, winger, striker, central defender te thlakin, a chang chuan kan result venhim tumin tlarhnunga player panga dah chang ka nei - chung match-ah te chuan draw result kan nei ṭhin a, hrehawm ka ti ṭhin hle.
"Engvangin nge goalkeeper ka thlak mai loh? Thil thleng a awma thlak danglam turin keeper ṭha tak tak kan nei reng alawm. Tunah chuan chutiang chuan ka ti tawh dawn. Ka ngaihdanah chuan kan team-a mi zawng zawng hi kan game-ah hian an inhnamhnawih ve tur a ni a, eng inelna pawh ni se, an inlan ve a ṭul a ni," a ti.
Arsenal hian tun season-ah league match nga khel tawhin tlawm an la nei lo a, season hmasa ang thoin Premier League champion an beisei ngam ang.