Milan an ṭang - Ibra-a'n training a chhim!

Zanin dar 10:15 hian Champions League inkhel en châkawm zinga mi en tur a awm dawn - AC Milan chuan kum 2002 hnua a vawi khat nana Champions League khel tur Newcastle United an mikhual dawn a, team pahnih an intiat tawk avangin inkhel hmuhnawm a beisei ngam ang.

AC Milan hian an league match hnuhnung berah Milan derby an khel a, an hmelma kumhlun Inter Milan lakah 5-1 ngawtin an tlawm. Milan tan mualphona tawpkhawk a ni a, fan-te an nguai a, player-te an zuai.

Hei vang hian team intihphur thar a ngai a, club legend Zlatan Ibrahimovic chuan Milan squad a tlawh hial - Swedish striker ropui hian club training chhimin, player-te a fuih phur a, coach Stefano Pioli chuan Inter laka an mualpho hnu khan player siksawi dan tur ngaihtuahin hun a seng nghal bawk.

Milan hian hrem vanga Inter laka inlan thei lo Fikayo Tomori chu an chhawr thei tawh dawn a, hei hian an tlarhnung pawp lutuk chu a tizia thei ang - Inter laka 'bo' Christian Pulisic pawh Pioli-a'n bench lamah a dah dawn nia sawi a ni a, a aiah Samuel Chukwueze a lut thei ang.

Inter laka hliam damkawr chunga inlan Olivier Giroud chu 100% fit chunga inlan tura beisei a ni a, French striker thlawp tura Rafael Leão a awm dawn bawk avangin Magpies tan thil a awlsam lo ang.

Zanina mipui mit fukna tur pakhat chu Sandro Tonali a ni. Milan midfielder hlui hian a club chhuahsan duh lo mah se, sum mamawh Italian club hian Magpies lamah an hralh nia sawi a ni a, zaninah a club hlui a hmachhawn thei dawn.

International break-ah Tonali hi inhliam mah se, Brentford lakah bench-ah a ṭhu thei a, zaninah bul ṭan tura beisei a ni. Premier League-a an match hnuhnung bera chawlh hahdamtir Alexander Isak chu bul ṭan tura beisei a ni a, tlarhmaah Anthony Gordon leh Harvy Barnes te nen an inkawp chuan Milan tlarhnung tan an hnawksak thei khawp ang.

Newcastle hian league match thum a zawna an tlawm hnuah Brentford hnehin an insiamṭha leh tawh a, tin, he team hi season ṭantira 5-1 a Aston Villa sawptu kha an nih avangin an tihfuh ni chuan dan an harsa khawp ang - zaninah inkhel hmuhnawm en in beisei rawh.