Champions League kan nghak chhuak ta

Europe-a football club inelna sang ber UEFA Champions League group stage chu zanin aṭangin khelh ṭan a ni dawn. Inkhel hi Sony Ten 1, Ten 2 leh Sony Liv kaltlangin a en theih ang.

Group stage-ah hian team 32 chu group riatah ṭhen an ni a, a vawi hnih ṭheuh an inkhelh kual hnuah a sang pahnihin knockout stage an lut dawn. UEFA hnuai inelnaah hian goal difference aiin head to head a pawimawh hmasa tih hriat a ṭha bawk.

Kumin chhungin group stage hi khelh zawh tur a ni a, last 16 hi nakkum February leh March-ah khelh a ni ang. Final hi ruahman dan chuan June 1, 2024-a khelh tur a ni a, Wembley Stadium-ah khelh a ni dawn.

Season liam ta khan Manchester City chuan final-ah Inter Milan hnehin a vawi khat nan an champion a, kuminah pawh Pep Guardiola hote hi champion tura rinkai an ni. Mahse, Europe inelna sang berah hian champion nawn chu sawi loh group stage paltlang ringawt pawh hi club ṭhahnem tak tan chuan hlawhtlinna a ni.