PSG khelmualah Dortmund an leng dawn

Paris St-Germain-in tun season-ah 'indinthar' an thupui a, an player senior leh hlawh tam tak tak an chhuahtir - Lionel Messi, Neymar, Sergio Ramos leh Marco Verratti te chu an chhuahtir langsar zual an ni a, Luis Enrique hoin indinthar hna an thawk mek.

Mahse, an beisei ang ngawt erawhin hna a awlsam lo hle. An league match hmasa pahnihah an draw a, match hnih a zawnin an chak zui a, mahse, an match hnuhnung berah an tlawm leh tawh. An mikhual Nice lakah 3-2 in an chak lo.

French club hian nipui transfer-ah Marco Asensio, Milan Škriniar, Lee Kang-in, Lucas Hernandez, Gonçalo Ramos, Ousmane Dembélé leh Randal Kolo Muani te ho an la lut a, Enrique-a'n a enkawl bawk avangin an result hian mak tih a hlawh.

Spanish coach tan a 'magic' a la bo tih pholan nan, Champions League-ah hnehna chang ngeia bul ṭan a ṭul a, mahse, zanin dar 12:30-a an hmachhawn tur hi Borussia Dortmund an nih avangin hna a awlsam bik hauh lo ang tih a chiang.

Dortmund hian league match li an khelh tawhah tlawm an la nei lo a, chuti lutuka inchhuang tur erawh an ni lo - match hnih an chak a, match hnih dang hi an khingpui nen an inhnehtawk.

Mahse, an match hnuhnung berah an chak avangin an inringtawk ang tih a chiang a, tlarhmaah Donyell Malen, Sébastien Haller, Niclas Füllkrug leh Karim Adeyemi ten mawhphurhna an lak thiam a ṭul a, midfield-ah Marcel Sabitzer, Emre Can leh Julian Brandt te mawhphurhna a sang leh bawk ang.

Chutihrual chuan zanina team pahnih intawnna tur hi PSG khelmual a ni a, a awlsam dawn lo - team pahnih tan hriat reng tur pawimawh erawh a awm. Group F hi AC Milan leh Newcastle awmna group a ni tel a, vawi khat chak loh a pawi thui thei.