India-in Sri Lanka sawpin nomawi an chawi

Asia Cup-ah India-in inelna thlengtu Sri Lanka chu wicket 10 tehmeuhin an sawp a, kum nga hnuah inelna lian thamah an champion. September 17, Pathiannia final khelhah hian Sri Lanka-in 50 runs chauh an siam a, India hian over 6.1 lekah target hi an umpha a ni.

India-in Cricket World Cup an thlen dawn avangin tun ṭuma nomawi an chawi hi chanchin lawmawm a tling a, final emaw stage sang chinah emaw an chetsual leh ṭhin avangin Asia Cup nomawi hian inrintawkna nasa tak a pe ang.

Indian bowler Kuldeep Yadav-a'n tun inelnaah wicket kua lain Player of the Series-ah thlan a ni a, final-a wicket ruk ngawt latu Mohammed Siraj chu Player of the Match-a thlan a ni.

Siraj Show

Ṭhumvawrah Sri Lanka an vannei a, captain Dasun Shanaka-a'n vuak hmasak a thlang. India bowler-ten hming chherna remchangah an hmang ta thung. India chhuanvawr Jasprit Bumrah-a'n bul a ṭan a, opener pakhat zawk Kusal Perera chu run pawh siamtir loin pavillion-ah a thawnkir.

Bumrah-a'n bul a ṭan ṭha a, Mohammed Siraj a rawn la che ṭha zawk. Hyderabad tlangval Siraj-a hian opener pakhat zawk Pathum Nissanka a vawm hlum leh a, Ravindra Jadeja-a'n Nissanka ball vuak hi a man ṭha ve bawk.

Siraj hian Sadeeer Samarawickrama a rawn vum hlum leh a, hattrick siam thei dinhmunah a ding. Kum 29 mi bowler Siraj hian hattrick siam ta lo mah se wicket li dang a la leh a, over sarih vawmin wicket ruk a lak bakah 21 runs chauh a pe.

Sri Lanka batter-te an chesual laklawh a, Hardik Pandya-a'n wicket thum lain run thum chiah a rawn pe bawk. Lions hian over 15.2-ah 50 runs an siam a, an thi fai vek.

A awlsam

Test khel ram chu sawi loh ODI khel pha chin ram tan chuan 51 runs target chu eng team pawh hmachhawn se thil harsa niin a lang lo a, batter nei ṭha ber zinga mi India tan phei chuan a awlsam lehzual.

Ishan Kishan leh Shubman Gill te rawn pen chhuakin final zawh thuai thuai an duh emaw tih mai tur a ni. Lions bowler Pramod Madushan leh Matheesha Pathirana ball vawm chu an hlap sak hrep ve ve a, over 6.1 lekah target 51 an thleng.

India captain Rohit Sharma chuan, "Bowler-te hnathawh ṭhat vang a ni a, kan beisei aiin ball a swing ṭha bawk. Tuna hnehna kan chan avangin inringtawk takin Australia kan hmachhawn thei ang a, World Cup ṭha takin kan khel thei ang," tiin a sawi.

India hian September 22, Zirtawpni aṭangin Australia nen ODI series an khel dawn. Cricket World Cup hi October 5, 2023 aṭanga khelh ṭan tur a ni.