Haaland-a'n UCL-ah goal a chhunzawm dawn em?

Manchester City chuan zanin aṭangin Champions League nomawi humhim hna an ṭan dawn. Pep Guardiola hote hian zanin dar 12:30 hian Etihad Stadium-ah Red Star Belgarde (Crvena Zvezda) an mikhual ang.

Season liam taa treble champion City hi an awmna group a nem a, English club awmnaah hian Red Star Belgarde bakah RB Leipzig leh Young Boys te an awm bawk. Hemi a nih avang hian City tan group stage paltlang a harsa dawn niin a lang lo a, Erling Haaland leh player dang tan record siam ṭhatna hun ṭha a ni thei ang.

Season liam ta khan Haaland hian goal 12 khungin top scorer a ni a, Pep Guardiola-a'n hahchawlhtir a tum loh avangin Red Star Belgarde tlarhnung tan ven a harsa dawn.

Haaland hian nikum khan Champions League-a goal 35 khung thei naupang ber record a siam a, kuminah pawh a inhliam a nih ringawt loh chuan record thar a siam belh ngei a rinawm. Norwegian striker Haaland hian tun season-ah pawh match sarih khel tawhin goal sarih a khung tawh a, goal tam tak khung tum tura a thawhrim rual hian ṭhiante goal khung tur erawh khungsak a tum lo.

Kartawp Premier League inkhelah khan Bernardo Silva goal khung tur chu goalline bul chiahah Haaland hian khawih thei mah se a goal dawn tho avangin a khawih duh lo. Hei hian Norwegian striker mize thui tak a pho lang a, faktu pawh an tam hle.