Bournemouth leh Chelsea inhnehtawk

Pathianni zan Premier League inkhelah Chelsea chu Bournemouth nen 0-0 in an inhnehtawk - Mauricio Pochettino enkawl Blues hian league match vawi nga an khelh tawhah ṭum khat chiah hnehna an la chang, champion sawi ngam a harsa ang.

Mikhual Chelsea lamin inkhel an thunun a, hun remchang pawh an insiam nual. Mahse, Nicolas Jackson-a'n hnai takah remchang nei mah se goal zawnah a pet thei lo, forward Raheem Sterling-a'n woodwork tih perin Levi Colwill-a goal chu offside vangin an pawm lo.

Manchester City aṭanga an lak thar Cole Palmer chuan a club thar tan goal a khung nghal teuh hle bawk, mahse Bournemouth goalkeeper Neto a paltlang thei ta bik lo a, point khatah an lungawi a ngai.

Pochettino chuan, "Khingpuite goal bul hnaiah khan kan rilru a fim tawk lo. Dawhthei leh uluk zawka kan chet a ngai a, inringtawk tak chunga goal khung tura kan beih a ngai bawk tih a takin kan hmu.

"A pawimawh hmasaah chuan tlarhma lama kan player-te kan ringtawk tur a ni, ka ngaihdan chuan remchang chu kan insiam hnem tawk viau a, theihtawp pawh kan chhuah," tiin an chak zo lo chu an vanduai vang niin a sawi.

Argentina manager hian inkhelh hmain an tan hnehna chan ngei a ngaih thu a sawi a, chhuanlam siam a rem lo tih a sawi bawk. Mahse, Tottenham leh Paris Saint Germain manager hlui hian a duh ang result erawh a la hmu thei lo.

Bournemouth tan result ṭha ni lo mah se point an hmu kha lawmna tur a ni ang. Andoni Iraola kaihhruaina hnuaiah tun season chu chak ni hmel an la hmu lo a, mahse inhnehtawkna aṭangin point thum an hlawh chhuak tawh thung.