Red Bull rorelna titawptu Sainz

Formula 1 season kal laiah Red Bull team an chungnung hle a, season chawhnu lam an hmang tawh chungin team dang tan hmun a kian dawn lo emaw tih tur a ni hman - mahse tunah chuan Carlos Sainz hming a rawn lang ta.

Ferrari driver Sainz hian Pathianni zan tir lama tlan zawh tak Singapore Grand Prix-ah hnehna a chang a, tun season intlansiak vawi 15 an neih tawh chinah Red Bull ni lo team dang an chak vawi khatna a ni hial!

Intlansiak hmabak pasarih an la nei dawn, team ṭha bik Red Bull tan pawh Singapore Grand Prix an hman dan hi inelnfiahna tur a ni dawn a, team dang tan chuan an tan kawng a inhawng ve tho tihna a ni thei bawk ang.

Sainz chungnung

Intlansiakna hmun Marina Bay Street Circuit, Singapore hi 5.063 km a thui niin kawng kawi 23 a awm a, a tir aṭanga tlan ṭha tak Sainz chuan a tawp thlengin hma a hruai tluan thei a, a bul ṭan ṭhat a chhawr ṭangkai hle.

Inelna zawh dawn tawh, lap hnuhnung ber tlan laiin George Russell a chesual - Mercedes driver a vanduai takah chuan Sainz hnungah McLaren driver Lando Norris leh Mercedes car khalhtu pakhat zawk Lewis Hamilton te an thleng.

Spanish driver Sainz chuan, "Intlansiak kan thunun thei a, kar tawp pumpui kha kan duh angin kan hmang thei. Ferrari leh ka tan chuan engkim mai kha duhthusam angin a kal emaw tih mai tur a ni hial.

"Engkim ka thunun thei a, car ṭha neih emaw driver ṭha neih emaw ringawt hi a tawk lo, car intlansiakna huanga chak tur chuan team thawhhona ṭha a pawimawh ber," tiin a sawi.

Kum 29 mi Sainz-a teammate Carlos Leclerc chu palinaah a thleng bawk a, dawhsan (podium) lawn dun thei ta chiah lo mah se, tun season chhung bik atan chuan Ferrari team chet ṭhat ber ṭum a la ni hial.

Pangana Max-a

Red Bull team tan tun season intlansiak zawng zawnga chak vek chu thil theih a ni ngawt bik lo, tun hnaia a zawna vawi 10 chak tawh Max Verstappen chu 11-na aṭangin a tlan chhuak a, a tawpah pangana dinhmun a luah.

Verstappen-a teammate Sergio Perez chu pariatna a ni a, anni pahnih hi driver championship lamah erawh an la sang fal viau. Max-a hian point 151 tehmeuhin hma a la hruai fal thei tho a ni.

September 24, Pathianni chawhma lam hian Japanese Grand Prix an tlan leh dawn, driver championship hmahruaitu Verztappen hi Singapore lama a chet ṭhat tawk loh avangin Japan ramah hian a la champion thei dawn rih lo.

Kum 2016 khan Mercedes driver pahnih Nico Rosberg leh Lewis Hamilton te chuan intlansiak 21 awm zinga 19-ah hnehna an chang thei, an record ṭha tak hi khum tur chuan Red Bull hian inelna neih hmasa pasarih zinga parukah an chak a ngai dawn.

Europe khawmualpui bikah inelna an zo tawh a, Asian aṭangin United States lamah car intlansiakna sang ber hi an la nei chhunzawm zel dawn - Red Bull tan pawh boruak a danglam anga insiamrem a ngai dawn tihna a ni.