Goal sur tirtu AS Roma

Jose Mourinho kaihhruai AS Roma chuan anmahni sawiseltute chu goal hmangin an chhanglet. Pathianni zan Serie A inkhelah Roma hian an mikhual Empoli chu 7-0 in an sawp.

Italian football inelna sang berah hian kum 1994 aṭang khan a chak zawkin point thum an hmu ṭhin, tuna an kalphung anga an kal hnuah team pasarih chu si sarih faiin an lo chak tawh, hnehna chang chiang ber zingah an tel ta a ni.

Italian football pumpui kan thlir a nih erawh chun, tun hma lama an kalphung ang an zawm lai kum 1929 October khan Roma hian Cremonese 9-0 in an hneh tawh a, chak chiang ber chu Torino (1948 May) niin Alessandria 10-0 in an hneh.

Tun season Serie A an match hmasa pathumah Roma hian chak ni hmel an hmu miah lo, tlahniam thei zingah an awm avangin sawisel pawh an hlawh nasa hman, mahse tunah erawh table laihawlah an invawrh kai leh ta nghal a ni.

Roma tan hian Paulo Dybala chuan goal hnih a khung bakah - Renato Sanches, Romelu Lukaku, Bryan Cristante leh Gianluca Mancini ten goal khat ṭheuh khungin Alberto Grassi chuan anmahni lamah a ti lut palh bawk.

Hliam vangin Chris Smalling, Houssem Aouar, Lorenzo Pellegrini leh Tammy Abraham te chu Roma tan season tir lamah hian an inlan thei lo, an result ṭhat tawk loh chhan pawh niin a lang.

Mahse, Belgian striker Lukaku leh Portuguese midfielder Sanchez te an la a, anni pahnih hi an khelh fuh ni chuan danglamna siam thei tura theihna nei an ni a, thil ṭha dang an beisei chhunzawm ngam bawk ang.

Inkhel dangah champion lai Napoli chu Genoa nen 2-2 in an inhnehtawk a, point sarih hmuin pangana an ni. League match vawi li an khelh tawh chinah Inter Milan chu chak kim thei awmchhun niin table hmahruaitu an ni.