Real an chak; Greenwood a inlan ve leh ta!
Spanish La Liga match nga khelh tawhah Real Madrid-in hneh loh an la tawng lo - Pathianni zan khan an mikhual Real Sociedad chu 2-1 in an hneh a, Spanish top flight league-ah hmahruaitu an nih chhunzawm.
Sociedad tan Ander Barrenetxea chuan goal hmahruai khung mah se, Real-in Federico Valverde leh Joselu hmanga chhangletin hnehna an chang daih.
Real-in hnehna an chan aia ngaihven hlawh zawk erawh Mason Greenwood inlan leh ta chu a ni a, Manchester United-in hmeichhe laka a hming chhiat avanga loan-a an chhuahtir forward hian Pathianni zanah Getafe jersey nen khelmual a lut ve leh ta.
100%
Santiago Bernabeu-a inkhelah rin loh takin mikhual lamin an khung hmasa a, Sociedad tan Barrenetxea chuan goal hmahruai a khung - goal dang lut loin chawlhlawk hman a ni a, chawlhlawk laia hma an hruai league match hnuhnung 46-a tlawm lo Sociedad an inringtawk.
Mahse, Real-in mikhual team lakah tlawm an tum lo. Second half ṭan aṭanga minute khatna lekah Valverde chuan si phurh sutna goal a khung a, an duhtawk mai lo - minute 60-naah Fran Garcia siamsak chu Joselu chuan tauh lutin, chak nan an hmang zui.
Real goal hnih hi Garcia assist ve ve a ni. Real tana a match hmasa palia goal nga khungtu Jude Bellingham erawh a goal khung loh zan a ni a, a chance neih ṭhat chu Sociedad keeper Alex Ramiro chuan ṭha zetin a dansak.
Hello Greenwood
Getafe-in 3-2 in Osasuna an hneh a, mahse, an result aiin Greenwood inlanin ngaihven a hlawh zawk - English forward hi a bialnu laka mawi lo taka chea puh a nih hnuah khelmualah kan hmu lo reng a, a thubuai neihte tihtawp ni tawh mah se United-in la chhawr ngam loin loan-in an chhuahtir.
January 2022 hnua a vawi khat nan Pathianni zanah Greenwood a inlan a, minute 77-naah bench aṭanga luhtir a ni - an chakna goal luh theih nana corner pet chu a hlawhchhuah a ni.
Getafe hian Stefan Mitrovic leh José Ángel Carmona hmangin vawi hnih ngawt hma an hruai a, Osasuna hian Iker Muñoz leh Ante Budimir (penalty) hmangin an chhanglet ve ve. A tawpah erawh Nemanja Maksimovic chuan Getafe tan goal khung lehin, 3-2 in an chak a, hun pek belha Fabrizio Angileri-a red card-in Getafe a tibuai phak tawh lo.