Hong Kong Open champion Christie-a

Badminton inelna Hong Kong Open khelh zawh takah Jonatan Christie a champion. Indonesian tlangval zingah champion thei hmasa ber a ni a, hmeichhe lamah Akane Yamaguchi a champion thung.

Pathiannia final inkhel hmuhnawmah Christie hian Kenta Nishimoto latah game hloh hmasa mah se, darkar khat leh a chanve an inkhelh zawh hnu chuan 12-21, 22-20, 21-18 in a chak zawkah a ṭang a ni.

Seeded pangana Christie chuan, "Kenta kha a beidawng duh lo, ṭhenkhat laiah phei kha chuan ka beidawng hman lek lek zawk fo, mahse beidawng duh loa ka tih let tlatna kha a tawpah ka dinchan phah," tiin a sawi.

Hmeichhe singles lamah Akane Yamaguchi chuan Chinese nula Zhang Yiman chu 21-18, 21-15 in a hneh ve bawk.