FIFA Ballon d'Or Messi, Messi, Messi, Messi, Messi

Barcelona forward Lionel Messi chuan khawvela footballer thiam ber chawimawina FIFA Ballon d'Or chu a vawi ngana atan Thawhṭanni zan khan a dawng.

FIFA hmunpui Switzerland khawpui Zurich-ah 'Ballon d'Or Gala' neih a ni a, chawimawina nomawi dawng thei tura chhawp chhuah pathum chu Messi, Cristiano Ronaldo leh Neymar te an ni. Player ropui bik pathum zingah Argentina captain a chungnung fal a, vote lut zawng zawng aṭangin 41.33% vote a hmu. Messi leh Ronaldo te'n Ballon d'Or award hnuhnung pariat an hui vek a, Portugal captain hian vawi thum a dawng ve tawh bawk.

Messi Career

1 - Messi hi FIFA Ballon d'Or award vawi thum aia tam dawng awm chhun a ni a, tuna a dawn hma hian 2009, 2010, 2011 leh 2012 khan a lo dawng tawh.

430 - Barcelona tan official com-pe-tition-ah match 503 khelin goal 430 a khung.

26 - Barcelona tana nomawi a chawi zat chu 26 a ni a, nomawi chawi hnem lamah Andres Iniesta nen record an chelh dun.

295 - La Liga-ah goal 295 a khung a, amah hnaih bertu Telmo Zarra aiin goal 44-in a khung tam.

28 - Barcelona tan hattrick 28 a siam tawh.

49 - Argentina tan match 105-ah goal 49 a khung.

16 - Kum 16 leka upa a nihin Barcelona tan a khel ṭan.

91 - Kum 2012 chhungin goal 91 a khung a, kum khat (calendar year) chhunga goal khung tam ber record German Gerd Muller-a'n kum 1972-a a lo siam tawh chu a khum.

58,000,000 - Twitter-ah pawh Messi hi a lar hle, vaibelchhe 5.8 zet a hming an lam.

2015 bikah chuan

• Kum 2015 chhungin Argentina leh Barcelona tan match 61 khelin goal 52 a khung a, assist vawi 26 zet a nei bawk.

• Minute 101 dana goal khung zel ang a ni a, minute 202 dana assist nei zel ang a ni bawk.

• La Liga-ah goal 34 a khung a, assist 15 a nei bawk. Kum 2015 bikah Europe League sang pangaah mahni league ṭheuha assist leh goal khung zat belhkhawma a record tluk pha chu Ronaldo chiah a awm.

• Kum 2015 hian club inelna parukah telin goal a khung vek a, pangaah nomawi a chawi. Messi nomawi chawina te hi La Liga, Copa del Rey, UEFA Champions League, UEFA Super Cup leh FIFA Club World Cup te a ni.

Ronaldo leh Neymar

Messi tluk pha lo mah se Ronaldo leh Neymar te hi an nep chuang lo. Kum 30-a upa Portugal captain hian kum 2015 chhung khan goal 57 a khung a, Champions League-ah goal 16 khungin record hial siam mah se Ballon d'Or vawi lina a dawng pha ta chuang lo.

Kum 23-a upa Neymar hi kum 2007-a Kaka-a'n Ballon d'Or chawimawina a dawn hnua Brazilian player a sang pathum zinga lang leh hmasa ber a ni. Barcelona forward hian game 62-naah goal 45-na a khung a, La Liga-ah Luis Suarez nen goal 15 khung tawhin joint top scorer an ni mek.

Messi a lawm

Kum 28-a upa Messi chuan, "Ka tan chuan hun pawimawh bik a ni a, tun hi hun danglam bik a ni. Cristiano-a'n chawi-mawina a dawn hnua Ballon d'Or award ka dawng leh thei hi a lawmawm. Tun hi ka tan chuan chawimawina vawi nga ka dawnna a ni a, ka naupan lai pawh hetiang hun hi ka suangtuah pha ngai lo," tiin chawimawina a dawn vanga a lawm thu a sawi.