Ballon d'Or voting system Thiam tih ber nge an vote duhsak zawng?

FIFA Ballon d'Or dawng tur hi FIFA hnuaia inziak lut ram coach, captain leh journalist-te thlan a ni. Ram khata football hre bik anga ngaihte ngaihdan a inang lo a, an thlan dan thlirin duhsak zawng vote an tam a, ngaihdan dik tak vote an awm tih a chiang bawk.

Vote lut zawng zawng belh-khawm hi 498 a ni a, vote thlak zingah India aiawh coach Stephen Constantine, captain Sunil Chhetri leh Hindustan Times sports writer Dhiman Sarkar te an tel. India coach Constantine hi Arsenal ṭantu a ni a, Gunners winger Alexis Sanchez chu pakhatnaah a thlang a, Manuel Neuer leh Sergio Aguero a thlang tel bawk. Captain Chettri thlan dan erawh result ang thlap a ni a, Dhiman Sarkar-a'n player pathum a thlan zingah chawimawina dawngtu Lionel Messi a tel lo.

Ṭan zawng nei

Wales coach Chris Coleman leh Ashley Williams te chuan an ram thiampuipa Gareth Bale chu an thlang ve ve a, Real Madrid forward hian vote zawng zawng 0.65% chiah a hmu. Germany coach Joachim Low pawhin Manuel Neuer, Thomas Muller leh Toni Kroos te a thlang a, German player zingah top 5-a lang pha an awm lo.

Player-te hian anmahni an in vote thei lo a, Ballon d'Or dawngtu Messi hian Barcelona tana a khelhpui Luis Suarez, Neymar leh Andres Iniesta te a vote. A elpui Ronaldo a danglam bik lo, Portugal captain hian Real tana a khelhpui Karim Benzema, James Rodriquez leh Gareth Bale te a thlang. Pathumna Neymar-a'n lawmman sem hma hauha dawng tura rinkai Messi chu pakhatnaah a vote a, Barca tana khelhpui Suarez leh Ivan Rakitic te a thlang tel bawk. Barca player pahnih hian Ronaldo an thlang lo a, Real player hian Barca player a thlang bik lo.

Vote hmu sang pathum hian an ram coach ṭheuhte hneh aṭangin vote an hmu vek a, coach-te hian player ṭha bik chu an thlang chiang a, an duhsak zawng an thlang tih erawh zep rual a ni lo.

Vote thlaktu tam zawkin an duhsak zawng aiin ṭha an tihzawng an thlang chiang a, chutiang zingah chuan French midfielder Paul Pogba unaupa Florentin Pogba a tel. Guinea captain Pogba hian Messi, Ronaldo leh Neuer te a thlang a, vote hmu sang 15 zinga langpa a unaupa Juventus midfielder Pogba a tel lo.