Rohit-a'n India a chakpui zo lo

Nimin khan India leh Australia chuan ODI series match nga an khelh tura an match hmasa ber an khel a, ropui takin Rohit Sharma khel mah se khualmualah India hnehna a chanpui zo lo. Australia hian wicket ngain hnehna an chang a ni.

W.A.C.A. Ground, Perth khawpuia inkhelah India an bat hmasa zawk a, opening batsman Rohit Sharma a khel
ṭha fal hle. Kum 28-a upa Nagpur tlangval hian ball 163 a hmachhawnah run 171 a vaw chhuak a, a tawp thlengin a dam.

Rohit Sharma opener pui Shikhar Dhawan erawh a che chhe hle a, Dhawan hian ball 22 a hmachhawnah run kua vaw chhuakin a out. Mahse, India tan Rohit Sharma bakah Virat Kohli a che ropui a, Delhi tlangval hian ball 97 a hmachhawnah run 91 a vaw chhuak.

India-in over 50 an hmachhawnah player pathum chiah an out a, run 309 vaw chhuakin Australia tan target huphurhawm tak an tuk sak.

Australia bat hun a thleng a, an opening batsman Aaron Finch leh David Warner-te an out hma a, run sawm pawh an siam hmain an out ve ve. Mahse, an khawtualah Australia an talbuai duh lo a, target sang tak um chungin captain Steven Smith leh George Bailey-te an rawn ding chhuak ve leh a, Indian bowler-te an sawisa.

Steven Smith hian ball 135 a hmachhawnah run 149 a vaw chhuak a, Bailey hian bawll 120 a hmachhawnah run 112 a vaw chhuak thung. Australia-in over 49.2-ah run 310 an siam a, wicket ngah hloh chunga India hnehin an vannei hle.

Indian bowler zingah star thar duhawm Barinder Sran a khel ṭha hle a, kum 23-a upa fast bowler hian India tana a match hmasa berah hian over 9.2 vawmin wicket thum lai a la a, run 56 chiah a pe a ni.

India leh Australia hian ODI series match nga khelh turah match li khelh an la hmabak a, an match hnihna hi January 15-ah Brisbane Cricket Ground-ah an khel leh ang.