Milan hian Juve entawn se - Kaka

Kaka chuan a club hlui AC Milan chuan tun hma a an ropuina ang nei let leh tur chuan Serie A champion Juventus kalphung chu entawn se a duh thu a sawi.

Brazilian midfielder Kaka hian kum 2007 khan Milan chu Champions League-ah a champion pui a, Ballon d'Or chawi-mawina a dawng bawk. Hemi hnu hian Spanish club lian Real Madrid lamah a kal.

Milan hi kum 2013-14 season khan Serie A-ah pariatna an ni a, tun hnai kum nga chhunga a vawi khat nan a sang pathum zingah an tel lo. Season hmasa pawh khan Milan hian hma an sawn thei chuang lo a, league-ah 10-na niin tun season-ah pawh match 19 khelh tawh aṭangin point 29 chauh an la hlawh chhuak a, table-ah pariatna an ni mek.

Hetih mek lai hian Milan elpui Juventus erawh 2006-07 season kha Serie B-a hun an hman zawk hnuah an insiam ṭha chho chak hle a. Tun hnaiah a zawnin season li chhung league title an la zawn tawh a, season hmasa khan Champions League final an thleng bawk.

Kaka chuan a club hlui chung chang sawiin, "Milan chunga thil thleng hi hriatthiam a har hle. Rei lote chhunga hetiang dinhmuna an tla thla ta duai mai hi pawm thiam pawh a harsa. Club hrang hrangin harsatna an tawk thei vek a, chumi lak aṭanga inkhaichhuak leh tur chuan Juve kal dan hi an entawn a
ṭhain ka hria. An dinhmun aṭang hian an insiam rem thuai a ṭul," a ti.