Pep-a'n Premier League manager-te hnenah ngaihdam a dil

Bayern Munich coach Pep Guardiola chuan England lama kal a tum vanga an hna chan mai thei dinhmuna ding manager eng emaw zat an awm avangin a manager puite hnenah ngaihdam a dil.

Spanish manager hian season tawpa a contract zawh rualin Allianz Arena chhuahsan a tum thu a sawi a, Barcelona manager hlui hi Manchester City, Manchester United, Chelsea leh Arsenal-te nen sawizawm nghal an ni.

Guardiola-a'n Bayern a chhuahsan tur thu tihchian a nih rualin City boss Manuel Pellegrini dinhmun a der-thawng nghal a, khawvela coach ṭha ber pawl Guardiola nei tur hian club hausa City hian sum sen an hreh lo ang.

Old Trafford-ah a sum sen zat leh a result a in mil hleihtheih loh avangin Louis van Gaal a tla na lo telh telh a, Chelsea-in Jose Mourinho an ban hnuah Guus Hiddink la lut mah se season tawp thleng atan bak Ducth manager hian contract a ziak lo. Arsenal-ah Arsene Wenger ban duhtu kumtinin an pung bawk a, anni pathum thlak tura hming ri ring ber chu Guardiola tho a ni.

Bayern Munich manager chuan, "Ka tihpalh a ni. Ka career-ah trainer ka ni emaw, player leh coach ka nihna ang pawn ka thawhpuite leh ka dinhmun anga dingte ka zah em em ṭhin. Keimah vanga dinhmun derthawng an awm a nih chuan ngaihdam ka dil a, ka tum reng vang a ni lo tih min hriatsak ka duh a ni," tiin a manager puite hnenah ngaihdam a dil.

Guardiola chuan,"Contract ka ziah fel thlap hunah ka club thar tur chu ka la puang chhuak ang," tiin a club kalna tur erawh a la sawichiang duh lo.