France rama zirlaite chuan zirna in leh dinhmun siamṭhat phuta nawrh an huaihawt chu nimin khan chhunzawmin, ram pum huap nawrh an buatsaih leh. Zirlaite hi pawl hrang hrang leh eptu party-ten an thlawp a ni.
Zirlaite hian September thla tawp lam aṭang khan lungawi lohna hi an lantir tawh a, kar liamta Ningania ram pum huap nawrh an huaihawt ṭum khan hmun hrang hranga nawrhnaa tel chu mi 70,000 chuang an tling. Pungkhawm zinga mi 500 chu man an ni bawk.
Thuneitute chuan term holiday a hnaih tawh avangin zirlaite nawrh huaihawt chu a ziaawm chhoh an beisei. A hmaa nawrh huaihawt avangin school te dangin zirna in ṭhahnem tak khar a nih phah a, zirlaite leh police-te innawr buaiin buaina te a lo chhuak tawh bawk a ni. Thawhṭannia Paris bial chhung leh Bordeaux leh Lyon khawpuia nawrh huaihawtnaah teaching staff pariatin hliam an tuar. Education Ministry chuan nawrh vanga school khar zat chu a tlahniam tawh niin a sawi.
Justice Ministry chuan nawrh huaihawt ṭantirh aṭangin police-ten an hren chu mi 6,800 an tling tawh a, a tam ber chu kum tling lo a ni tih sawi. Police lam chuan nawrh huaihawtte laka police-te chetdan rawng tak nia sawiselna awm chu chhui chian a nih tur thu an sawi ve bawk.
Hetih lai hian zirlai nu leh pa bakah, zirlai tam tak chuan lungawi lohna lantir avanga class lak theih loha awm ṭhin chu pawi an tih thu sawiin, ṭhenkhat chuan eptu party-te chuan sorkar beihna atan zirlaite chu hmanruaah an hmang nia an ngaih thu an sawi. Nu leh pa tam tak chuan school dan a ni chu titawp turin zirlaite pawh an ngen a, zirna chhunzawm duh zirlai tak tam tak dan chu democracy kalphung a ni lo tih an sawi a ni.
