North Atlantic Treaty Organization (NATO) summit chu nimin khan Turkey khawpui, Ankara-ah ṭan a ni a, vawiinah an chhunzawm ang.

West Asia buaina a chhuah hnuah, US president Donald Trump-a'n NATO member ramte chu defence lama sum dah tipung turin a nawr a, hemi chhan letna atan sipaite thuam chakna turin dollar tluklehdingawn tel hu military contract pawh an siam thar rin a ni.

Nikuma NATO summit-ah khan member ramte chuan defence budget chu kum 2035-ah GDP aṭanga 2% dah ṭhin chu 5% a tihsan an lo remti tawh a, hemi aṭanga 3.5% chu sipai thuam chakna tura ruahman niin, 1.5% chu security leh a kaihhnawih thil atana tih a ni thung.

Khawvela sipai thawhhona lian ber, NATO-ah hian North America leh Europe-a ram 32 an tel a, kum 1949-a an dina ṭuma founding member hi ram 12 - Belgium, Canada, Denmark, France, Iceland, Italy, Luxembourg, the Netherlands, Norway, Portugal, the United Kingdom leh United States an ni. A bak hi chu a hnu lamah an la luhte niin, lak luh thar ber chu Sweden a ni.

Ankara-a summit ah hian member ram 32 hruaitute bakah, member ni lo an thawhpui ram Ukraine president Volodymyr Zelenskyy leh South Korea president Lee Jae-myung te an tel. Australia, Japan leh New Zealand chuan defence minister an tir bawk.

NATO member ram 32 ten sipai ṭanglai an neih zat hi mtd 3.65 vel a ni a, mahse US ringawt hian mtd 1.3 a nei pha a, hei a pumpui aṭanga hmun thuma ṭhena hmun khat a tling. Turkey in dawtin 481,000 a nei. Europe ram zingah France, Germany, Poland, Italy leh UK chuan 130,000 - 200,000 vel an thawh a; Greece leh Spain in 100,000 vel an nei ve bawk. Luxembourg chuan 900 neiin, Iceland chuan sipai a nei ve lo a ni.