Pakistan National Cyber Crime Investigation Agency chuan prime minister hlui, Imran Khan-a farnu, Noreen Niazi chu social media-a an ram sipai a sawiselna a darh chungchangah thu zawhfiah turin an ko.

Agency chuan Noreen Niazi thusawi chu thu dik lo leh mipui fuihpawrh thei thil a ni tiin, an ram sipai tihhmingchhiat tuma dawt thu thehdarhah an puh a ni. Inrinni khan hriattirna hi pein, Islamabad-a an office-a kal turin an ti a ni.

Niazi thusawi hi social media lamah a darh nasa hle a, kum 2025 May thlaa India leh Pakistan sipaite inbeihna khan Pakistan sipai hotu leh India prime minister Narendra Modi-te inthurualna ) vanga thleng a nih thu leh, sipaiten hmingṭhat an hlawh theih nana ruahman a nih thu a interview-naah a sawi a ni. India-in buaina a vawrh len loh chhan pawh Pakistan-in Israel chu ram pakhata pawm a tum hnaih vang a ni tiin, he thil thleng hi Pakistan-in Abraham Accords a zawm theih nana kawng sialna tura ruahman a nih thu a sawi bawk.

Pakistan hi Israel pawm loturam zingah a la tel a, diplomatic lamah inlaichinna pawh an la nei lo a ni. Abraham Accords hi kum 2020-a US kaihhruaina hnuaia siam niin, Israel leh Arab ramtein diplomatic, economic leh securit lama inremna an siamna a ni. He Accord hi UAE, Bahrain, Sudan leh Morocco pawhin an pawm a ni.

Pakistan Muslim League-Nawaz (PML-N) hruaitu, Punjab province-a information and culture minister Azma Bokhari chuan, Noreen Niazi thusawi dan hian a nuṭapa, Imran Khan-a rilru put hmang a tarlang tih sawiin, Khan-a chhungte hi Pakistan hlawhtlinna hrang hrangah an lawm lo a, ram tana pawi thei tur thil an sawi fo a ni, a ti.