Israel prime minister Benjamin Netanyahu chuan Australia prime minister Anthony Albanese chu Australia-in Palestinian state pawm a tum thu a sawi chungchangah Israel phatsan a, Juda mite thlauh thlaaah a puh.

Australia PM-in Palestinian ram pawm an tum thu a sawi hnuah, Thawhṭanni khan Israel ṭangrual sorkara tel member-te chu an rama luhsak a phalsak lo a, hei vang hian Israel nena an inkar boruak pawh a ṭha lo chho hle. He thil thleng vang hian Israel chuan Palestinian Authority-a Australia palai visa pawh a tihtawp sak nghal a ni. Netanyahu chuan Anthony Albanese chu politician chak lo tia hriatreng a nih tawh tur thu a sawi.

Israel far-right politician, Simcha Rothman chu Australia-a Australian Jewish Association (AJA) hun buatsaihah thu sawi tura sawm a ni a, mahse, Australia chuan an rama luh phalsak loin a visa a tihtawp sak. Mahse, AJA chuan Rothman hi virtual-in thu sawitir tho an tum tih an tarlang. Nikumah justice minister hlui, Ayelet Shaked chu Australia-a a zin a lo phalsak tawh lo bawk a ni.

Rothman visa tihtawp sak a nih hnu hian Israel foreign affairs minister Gideon Sa'ar chuan Canberra-a Israel embassy hnenah Autralian aṭanga Israel zin tum, visa diltute chu uluk taka enfiah turin a chah ve nghal a ni. Sa'ar chuan Australia ramah Juda mite huatna leh, Juda hnam leh Juda institution laka tharum thawhnate a thlen laiin, Australia sorkar chuan boruak bengdai zawng ni loin, a tihluar zawnga kal a thlang a ni, a ti.

Australia hian tun thla tir lam khan Palestinian state hi an pawm dawn tih a puang a, PM chuan indonain pawisawi lo mi tam tak a nghawng dante chu Netanyahu chuan a haider tlat niin a sawi. Palestinian state hi UN member 193 zinga 147-in an pawm tawh a, Australia hma hian UK, France leh Canada chuan an pawm tur thu an lo puang tawh bawk.