Obama-a'n IS laka sipai chakna hman phalsak turin ngen

US President Barack Obama chuan Islamic State (IS) firfiak pawl beihna tura sipai chakna hman phalsak turin Congress a ngen.

State of Union address a neih hnuhnun ber turah hemi thu hi sawichhuakin, "Congress hian indona kan beih mek hi hnehna chan a duh takzet a, kan sipaite leh khawvel hriata he thu hi hriattir a duh a nih chuan IS lakah sipai chakna hman hi a phal tur a ni," a ti. Al-Qaida leh IS chu America mipuite himna tiderthawng thei an nih thu sawiin, firfiak chu tlemte ni mah se, mihring nunna hlutna an neih loh avangin pawi nasa tak an thlen thei a ni, a ti. Hemi rual hian IS chu US tichhe thei khawp a ni lo tih a sawi nghal bawk.

US kaihhruaina hnuaiah ṭangrual ram 60 chuang chuan Sy≠ria leh Iraq-a IS lakah thlawhtheihna hmangin beihpui an thlak mek a, mahse khawmual sipai erawh an la tir lut lo. Kum khat chuang zet beihpui hi an thlak tawh a, ṭum 10,000 vel IS hmunte hi an bomb tawh a ni.

Ṭangrual ramte'n beihpui an thlak hnu hian IS hian Iraq-a a ram lak zinga 40% chu a hloh tawh nia sawi a ni. Tun hnaiah pawh Iraq sipaite chuan Anbar province-a Haditha khua chu fir≠fiakte kut aṭang hian a la let leh tawh a ni.

IS hian Iraq bakah Syria rama a ram lak pawh 20% a chan tawh bawk niin ṭangrual ram thupuangtu, Col. Steve Warren chuan a sawi.

Nikum May thla aṭang khan firfiakte hian Iraq ramah ram eng zat mah an lak belh tawh lo a ni, a ti.

Security force-te'n an ram luah ṭhenkhat lakkir sak mah se, IS firfiakte hian hmun dang lak belh tumin an beih chhunzawm reng a ni. Haditha khua an chan hnuah pawh, a chhehvel bial chu lak tumin security force-te nen Thawhṭanni leh Thawhlehni khan darkar 48 zet an inbei leh.