US-in NKorea hrekna tur a thlawp
US House of Representative chuan North Korea ramin nuclear program a kalpui avanga a hrekna tur a pawm.
South Korea pawhin kar kaltaa NKorea-in hydrogen bomb a enchhin avangin hremna pe ve ngei turin China a phut bawk.
Kar kaltaa NKorea-in hydrogen bomb a enchhin kha nuclear test a neih ṭum li-na a ni a, an ram hotu lu ber, King Jong-un chuan an ramin nuclear ralthuam tam zawk neih belh zel a tum thu a sawi bawk.
US House-a NKorea chungchang ngaihtuahnaah, hrekna dan siam chu member 418 in an thlawp a, member 2 in an duh lo thung.
Senate hruaitute pawhin ngaihtuah thuai an tum thu an sawi.
House bill hi kum 2015 kum tir khan pharh a ni tawh a, mahse House-ah vote lak a la ni lo.
Kar kaltaa NKorea-in nuclear ralthuam a enchhin leh tak avangin vote hi an la ta a ni.
He bill hmang hian NKorea hotu, Kim Jong-un leh a official-te chu sum lamah hrekin, foreign bank-a sum an neihte khawih chet theih loha hrensak an ni thei dawn a ni. Mahse he bill hi a taka hmang tur chuan Senate-in a pass ve leh phawt hnuah, President Barack Obama-a'n a hming a ziah hnan a ngai dawn a ni.
US Congress chuan Pakistan hnena fighter jet, F-16 pariat hralh tumna pawh a dang khawtlai.
Nikum October thlaa Pakistan Prime Minister Nawaz Sharif-a'n US a tlawh ṭum khan, President Obama kaihhruai sorkar chuan Pakistan hnenah F-16 pariat hralh a tum thu hi a thuphungin a lo hriattir tawh a ni. Mahse Pakistan ramchhunga firfiak awmte beihletna kawngah Pakistan sorkar chu hma la ṭha tawk loa an ngaih avangin Congress hian fighter jet leitir an tum pawh hi an dang ta rih a ni.