Jakarta-a bomb puakah mi paruk an thi

Indonesia khawpui, Jakarta-ah nimin khan ṭum eng emaw zat bomb a puak a, silai hmehpuah zui a ni bawk.

Bomb puak vang hian mi paruk an thi a, an zingah hian police official pathum an tel.

Bomb hi ṭum sarih vel tihpuah nia hriat a ni a, bomb puak zinga pakhat hian Presidential palace leh UN office awmna bula shopping centre pawh a fuh a tel a ni. A dangte hi Jalan Thamrin-a Star Bucks cafe bakah Chikin, Silpi leh Kuningan hmunahte tihpuah a ni.

Pawikhawihna a thlen hnu hian police za tel chu khawpui chhungah hian dahluh nghal an ni a, an zingah hian sniper-te pawh an tel. Bomb tipuaktu nia hriat≠te nen hian kawtthlerah an inkap zui a ni.

Pawikhawihtute hi eng pawl nge an nih hriat a la ni lo a, an tih nia inchhal pawh an la awm lo.

Indonesian National Police thupuangtu, Gen Atnon Charliyan chuan pawikhawihtute hian kawngpui pengṭhuam laia traffic police post chu an bitum ber nia a lan thu a sawi a, he hmun hi bomb puak hian a tichhe nasa hle.

Pawikhawihtute hian silai leh grenade an pai bawk a, an zinga pakhat chuan bike a hmang a ni.

Bomb tipuaktute hi hriatchian la ni lo mah se, Gen Anton chuan nikum November thla khan Islamic State (IS) firfiak pawl chuan Indonesia ram beih an tum thu information an lo dawng tawh niin a sawi.

Jakarta-a US embassy chuan bomb puah hnu hian thuchhuah siam nghalin, America mi awmte chu fimkhur tur leh, bomb puahna bialte chu pumpelh tum turin a ngen.