Syria mite chhawmdawlna tur a thleng
Syria tualchhung indona thleng avanga ei tur tlachhama awm mek, Lebanon ramri bula Madaya khaw mipuite chhawmdawlna tur
International Committee of the Red Cross-in a thawn chu Syria thlenpui a ni.
Madaya bakah hian Syria hmarthlang lama Kegraya leh al-Foua khaw mite tana chhawmdawlna hi pek a ni bawk. Heng khuate hi helho in an thunun avangin tlawhpawh theih lohin an awm mek a ni.
Syria state media chuan Ningani khan ei tur phurtu truck parukin Madaya khua hi an lut niin a tarlang.
Hun rei tak chhung Madaya khuaah hian Syria sipai leh helho inbeiin, luh leh chhuahte an dangchat vek a, hei vang hian khaw mipuite hian ei tur an tlachham tawh a, hnimhnah leh an ranvulhte chaw atan an hmang tawh nia sawi a ni. Rilṭama thi pawh eng emaw zat an awm hman tawh a ni.
International Committee of the Red Cross director, Dominik Stillhart chuan ICRC team-in Madaya khua an luh hian, mipuite'n an ei tur a thleng tih an hria a, an lo hlim hle a, ṭhenkhat chu an hlim vangin an ṭap hial niin a sawi.
Stillhart chuan ei tur tam zawk thawnluh belh tum a nih thu a sawi bawk.
UN human rights official chuan indona avanga mipuite ei tur tlachhama hren rilṭam chu pawikhawihna lian tak a nih thu a sawi.
Ei tur leh damdawi phurtu, truck 45 vel chu Madaya pan hian tirh an ni a, an la thleng kim lo a ni. Al-Foua leh Kefraya khuaah truck 18 tirh an ni bawk.
Madaya khuaah hian mi 40,000 vel an cheng a, al-Founa leh Kefraya-ah hian mi 20,000 vel an cheng.
Syria ramah hian khua an hrenbeh 15 vel a awm niin United Nations chuan a tarlang a, heng khuaa cheng mi 450,000 vel chu khawiah mah kal thei lo tura dan beh an ni a, heng mite hian harsatna nasa tak an tawk mek a ni, a ti.
UN chuan Syria mipuite harsatna tawh mek chungchang leh,
ṭanpui an nih theih dan tur ngaihtuah turin January 25 hian Switzerland-ah inbiakna buatsaih a tum.
Kum nga chhung zet Syria-in tualchhung indona a hmachhawn avangin mi 250,000 chuangin nunna an chan tawh a, mi maktaduai 11 velin an chenna hmun an tlanchhiatsan tawh bawk.