Al-Qaida hotuin Saudi Arabia a vau

Saudi Arabia sorkarin January 2-a firfiaka chetna kawnga inhnamhnawiha a puh, mi 47-te a tihhlum avangin al-Qaida firfiak pawl chuan Saudi vauna thu a tichhuak.

Al-Qaida hotu, Al-Zawahiri chuan tunkar tir lam kha Saudi vauna audio recording hi a tichhuak a, an pawl mi leh sate chu Saudi rama roreltu, Al Saud chhungkua bei turin a fuih. Audio recording tihchhuah hi minute sarih-a rei a ni.

Egypt doctor leh firfiak pawl hotu, Al-Zawahiri chuan amah zuitute chu Al Saud chhungkua bei tura fuihin, "An rorelna hnuaiah in sakhua chu tihchhiatin a awm a ni," a ti. Zawahiri hian Israel leh kawthlang ramte pawh bei tura fuihin, hei hian Al Saud chu a ti na dawn hle a ni, a ti.

January 2-a mi 47 an tihhlum zingah khan kum 10 liamtaa Saudi-a al-Qaida ten pawikhawihna an thlen ṭuma thiam loh chantir mi eng emaw zat an tel.