Merkel-i hnenah raltlan phurtu bus tir
Germany Chancellor Angela Merkel-i kaihhruai sorkar refugee policy duh lohna lantirin, chhim lama Bavaria state politician pakhat, Peter Dreier chuan raltlan 31 phurtu bus chu Berlin-a Angela office-ah a tir.
Bavaria leh Berlin inkar hi bus-in darkar 7 vel tlan a ni a, km 550-a thui a ni. Bus hi Bavaria state-a Landshut khua aṭanga tirhchhuah a ni a, nimin tlai lam khan Berlin hi a thlen rin a ni.
Peter Dreier-a chuan, "Germany hian raltlan maktaduai khat a lakluh chuan, district hrang hranga sem kualin kan district pawhin mi 1,800 kan lo dawn a ngai dawn a ni. Hemi zat hi chu kan lo dawng ang a, a aia tam in rawn dah a nih chuan i office lam panin ka rawn tir zel ang," tiin Merkel-i hnena thu a chahah a sawi.
Middle East leh Africa ram aṭanga raltlan an pun zel avangin Germany pawh hi raltlan tam zawk la lut tura nawr a ni a, nikum khan raltlan maktaduai 1.1 ve la lutin, nitinin luh belh an la awm reng a ni.