US leh Iran-in an mi man 5 ve ve inthleng

US leh Iran chuan inremna an siam hnuah an mi man panga ve ve an inthleng. Tang inthlengna atan hian Qatar chuan palai hna a thawk a ni.

American tangte hian Tehran aṭangin Qatar khawpuia Doha International Airport chu Thawhṭanni khan an thleng a, hemi hnuah US lam panin an thlawk leh a ni.

Iran mi US-in an man panga zinga pahnih chuan Qatar kaltlang thoin Iran an thleng tih Iran Press TV chuan a tarlang. Tang zinga pathumte chu Iran a let duh loin, pahnih chu US-ah an cham zui a, pakhat chu ram dangah a kal thung.

Iranian foreign ministry spokeperson Nasser Kanani chuan Iranian tang pahnihte chu US-a khawsa ṭhin an nih avangin US-a awm hi an thlang zawk tih Thawhṭanni khan a sawi.

Ram pahnihte hian tang an inthleng tawn theihna atan hian US-in South Korea-a Iran sum, USD tld 6 khawih chet theih loha a hrensak chu a hlip a ni.

Kanani chuan, "South Korea-a Iran asset hrensak chu hlih a ni a, vawiin aṭang hian sorkar leh ramin a duhdanin a hmang thei tawh dawn a ni," a ti. Iran central bank chief Mohammad Reza Farzin pawhin Euro tld 5.5 ($ tld 5.9) chu Qatar account-ah a luh tawh thu a sawi ve bawk.

Iran president Ebrahim Raisi chuan Tehran-in American tang pangate an chhuah chu mihring puite chunga ṭhatchhuahna liau liau a nih thu a sawi.

US President Joe Biden pawhin US khua leh tui panga lo kirte chu lo lawmin, chhuah zalen an nih theih nana an thawhpuite chungah lawm thu a sawi a, US khua leh tuite chu Iran-a kal chungchangah fimkhur tura chahin, man an nih chuan, an zalenna Washington-in a tiam thei lo, tih a sawi bawk.