Japan-ah mi 10 zinga pakhat zelin kum 80 an pel tawh

Japan ramah nau piang an tlem a, kum upa lam an pung zel. A ṭum khatna atan an ram mipui zingah, mi 10 zinga mi pakhat zel chu kum 80 tling tawh an ni.

National data-in a tarlan danin, Japan ram mipui maktaduai 125 zinga 29.1% chu kum 65 leh a aia upa an ni.

Japan hi khawvela nau piang tlemna ber leh kum upa tamna ber ram zingah hun eng emaw chen a tel tawh a, hei hi an buaipui chho hle tawh a ni. Kum 2040 a nih meuh chuan, kum 65 aia upa hi mipui awm zat aṭanga 34.8% ni tawh tur angin National Institute of Population and Social Security Research chuan a chhut.

Ram chhunga elderly employment rate chu ram hausa zingah a sang ber pawl niin - ramchhunga hnathawk awm zat 13% chu kum 65 leh a chung lam an ni.

Japan ramah hian hnathawh hun chhung a rei avang leh khawsak man a san em avangin pian pun tuma hmalaknain awmzia a nei thei meuh lo nia sawi a ni. Nikum chhung khan Japan-ah hian nau piang hi nuai 8 aiin an tlem a, kum zabi 19-na hnu lama nau piang tlem ber ṭum a ni.

Prime minister Fumio Kishida chuan nau piang an tlem zel avangin Japan chu society ang pawhin a awm thei tawh lo tih January thla khan a lo sawi tawh a, mahse, thuneitute lam chuan nau piang tlem lutuk tiziaawm tura ram dang mi hnathawkte lak luh erawh an remti lo thung.