Ukraine-in Poland, Hungary leh Slovakia a khing

Ukraine chuan World Trade Organization (WTO)-ah Europe-a ram pathum - Poland, Hungary leh Slovakia-te chu Ukrainian grain lak luh an khap avangin an khing. Ukrianian official-te chuan hemi hma hian an ṭhenawm ram pathumte chu European Commission thutlukna an bawhchhiat avangin khin an tum thu hi an lo sawi tawh a ni.

Poland leh Hungary ramte'n anmahniin lak luh khapna dan an siam dawn tih an sawi hnuah, September 15-a European Commission-in Ukranian grain-te khuahkhirhna phelh tura thutlukna a siam chu zawm loin, ram pathumte hian khapna hi an siam a ni.

Ukraine chuan ram pathumte hi an khing tih sawiin, deputy prime minister leh economic minister Yulia Svyrydenko chuan, "Member ram mal hian Ukraine bungruate lak luh a khap ngawt thei lo a, hei vang hian heng ramte hi kan khing a ni," tiin thuchhuah a siam.

Poland, Bulgaria, Hungary, Romania leh Slovakia ramte chuan an tualchhung bazar-a an thlai tharchhuah man tlak hniam chhanah Ukriane tharchhuah grain-te an puh.

Poland hi Russia leh Ukraine indonaah Ukraine lam ṭang rinawm tak ni mah se, Ukraine grain lak luh chungchanga buaina hian an inlaichinna a tihderthawn phah hle. Ukraine-in a khin hnuah pawh hian, Poland chuan khuahkhirhna hi hlih an tum loh thu an sawi."Kan dinna ngaiah kan ding, a dikin kan hria, EU leh international law-in thuneihna a pek anga ram economy zir chiang chunga thutlukna siam a ni," tiin Poland sorkar thupuangtu Piotr Muellerchuan a sawi.