Iran ram hrekna hlip
Nuclear program a kalpui avanga Iran ram hrekna chu kar kalta Inrinnni khan hlih a ni ta tih international watchdog, International Atomic Energy Agency (IAEA) chuan a sawi.
Iran ram hrekna hlih a nih theihna tur hian nikum July thla khan inremna hi siam a ni a, Iran-in nuclear program a kalpui chhunzawm zel tur danna tura inremna an siamin a phut angte a zawm kim vangin an ram hrekna pawh hi hlih a ni, tiin IAEA chuan a sawi. Khawthlang ram hrang hrangte chuan hrekna hlih a ni ta chu lawmawm an tih thu an sawi a, mahse Israel Prime Minister Benjamin Netanyahu chuan Iran hian nuclear bomb siam a la tum reng dawn niin a sawi thung.
Iran President Hassan Rohani chuan an ram hrekna hlih a nih tak avangin Iran chuan bung thar a kai dawn a ni, a ti.
Inremna siam tak chu eng ram tan maha thil pawi a nih loh thu a sawi a, an inremna siam chu mi tinin lawmawm an tih thu a sawi.
Nimin zing khan thuchhuah siamin, President Rohani chuan, "Keini Iran mipuite chuan khawvel hriatah kan inhuatna, inrinhlelhna leh inphiarna te dah ṭha a, inṭhianṭhatna siam kan duh zia kan lantir a, Iran leh khawvel inlaichinna kawngah bung thar kan keu dawn a ni," a ti.
Hrekna hlih a ni ta chu Iran sum dinhmun tan pawh chhin≠chhiah tlak a nih thu sawiin, oil
aṭanga sum hmuh ringawta an innghahna pawh a ziaawm phah dawn a ni, tiin Rohani chuan a sawi.
EU foregin policy hotu, Fe≠derica Mogherini chuan Iran-in inremna a siam thei ta leh, an ram hrekna hlih a nih chuan a chhehvel bial bakah khawvel pum huapa remna leh himna a awm theihna kawngah a pui nasa thei hle dawn a ni, a ti.
Inremna an siam anga Iran-in nuclear program a tawpsan dante enfiah chhunzawm zel dan tur ruahman turin nimin khan IAEA hotu Yukiya Amano chuan Iran hi a tlawh nghal bawk. Hrekna hlih a nih theihna tur inremna an siamah hian Iran chuan Arak khaw bula water-reactor a siam tihchhiat te leh, a hmanrua neih tihtlem te a tel a ni.
He inremna hmang hian Iran thil neih, khawih chet theiha loha hren, dollar tluklehdingawn 100 hu chu tihchhuah sak a ni thei dawn a ni.
Hrekna hlih a nih hnu lawkah hian Iran transport minister chuan Europe-a Airbus company nen passenger phur chi thlawhtheihna 114 leina tur inremna an siam nghal niin a sawi.
Ni khata crude oil barrel a thawnchhuah ṭhin pawh a leta a pun nghal beisei a ni bawk. Company hrang hrang pawhin Iran hi sumdawnna an neihpui theih tawh bawk ang.
Iran hrekna hlih a nih hnuah hian US President Barack Obama chuan hrekna dan bawhchhiaa puha man, Iranian-American pathumte chu a ngaihdam a, US pawn lama Iran mi pali te laka thubuai siam pawh tihtawp tum a ni nghal bawk.
Iran pawhin America mi panga a hren mekte pawh chhuah a a remti nghal a, an zingah hian Ira≠nian-American Kristian pastor, kum 2013-a an ram himna dan palzuta puha kum riat tang tura thiam loh a chantir tawh pawh a tel.