Myanmar peace conference chhunzawm tum

Myanmar Union Peace Conference vawi khatna, ni nga awh neih chu kar kalta Inrinni khan a tawp.

Conference hi an ram khawpui, Nay Pyi Taw-ah neih a ni a, March thlaa sorkar lai hun a tawp a, sorkar thar a din hunah pawh conference hi neih chhunzawm leh an rel.

Vice President Sai Mauk Kham chuan peace conference chu stakeholder group-te inkara inrintawnna siamna hun ṭangkai leh pawimawh tak a nih thu a sawi.

Conference tawp ni hian stakeholder pasarih-te chuan rawtna an neihte an thehlut nghal a ni.

Peace conference hi President U Thein Sein-a'n a hawng a, kum 1948-a independence an hmuh hnuah inhmuhkhawmna lian ber a ni.

He conference-ah hian sorkar, parliament, sipai leh chi bing pawl hrang hrang aiawhte an tel a, a ṭum khatna atan eptu hruaitu Aung San Suu Kyi-i pawh a tel.

Myanmar tualchhung boruakin ziaawm lam a pan zel avangin khualzin tlawhtu pawh an pung chak hle. Nikum November thla thleng khan tlawhtu mi maktaduai 4.2 an awm a, kumin April thlaah mi maktaduai 5 an tling an rin thu Ministry of Hotels and Tourism chuan a tarlang.

Kum 2015 chhung khan hotel and tourism sector bikah investment US dollar tluklehdingawn 2.64 hu an hmu bawk.