NKorea-in SKorea-ah leaflet maktaduai 1 thawn lut

Democratic People's Republic of Korea (DPRK) chuan South Korea sorkar sawiselna thu ziak maktaduai khat chuang zet chu South Korea ram chhungah a thawn lut.

South Korea defence ministry thupuangtu, Kim Min-Seok chuan he thi hi nimin khan sawiin, North Korea sipaite hian kar kalta Nilaini aṭanga khan ramri aṭangin SKorea sawiselna thu ziak hi nitin an theh≠lut a, nimin thleng khan copy maktaduai khat vel an thawnlut tawh niin a sawi.

Thuziak an thehdarhah hian South Korea sorkar leh an President Park Geun-hye te chu nasa taka sawisel a ni a, ramri bul aṭangin hellium balloon hmangin an thawn lut a, an lehkha thawnluh ṭhenkhat hian South Korea khawpui, Seoul hmun ṭhenkhat pawh a thleng a, mahse a tam zawk chu ramri bula Gyeonggi province-ah an tla a ni.

Hetihlai hian South Korea pawhin ramri-ah, North Korea lam hawiin loudspeaker hmangin North sorkar sawiselna thu an la tichhuak chhunzawm reng bawk. Hei bakah hian electric signboard lian tak dah a, NKorea sawiselna thu leh video-te tihchhuah a tum mek bawk.

South Korea pawh hian North ramchhungah hian leaflet hi a lo thehdarh ṭhin a, mahse kum 2004-a inremna an siam hnu khan a titawp ta a ni. Hemi hnuah hian civic group hrang hrangte chuan chuan North Korea lamah hian balloon hmangin an ram sawiselna thuziakte hi an la thawnlut fo a ni.